Diasabra dia 12 di oktober 2024, organisacion Women empOwering Women (WOW) Aruba lo presenta nan prome “camp” dedica na nos dama nan entre edad 13 pa 19 aña pa asina nan considera un futuro carera den tecnologia.
Kico ta nifica GRIT!: GRIT ta para pa Girls Represented in Tech. GRIT ta tambe un characterista cu un persona ta posee cual ta un combinacion di pasion y preserverancia cu ta haci cu e individual ta logra su meta den largo plaso, irespecto cualkier contratiempo cu por presenta.
E camp aki ta uno special mirando cu ya hopi trempan den un hoben su estudio, e tin cu escoge un profiel den e richting cu e ta desea di sigui, y hopi liher despues di esey e lo mester haci e decision den ki ramo e ta desea di sigui studia of traha. Y manera nos por wak con mundo ta avansando, tecnologia ta incorpora den tur cos, den nos systemanan financiero, den nos manera di comunica, den educacion y hasta den salubridad. Hunto cu esaki, funcionnan den e ramo di tecnologia ta creciendo rapidamente. Pues cu e tech camp aki, nos ta desea di informa, motiva y inspira e hobennan pa explora un carera den e ramo di tecnologia.
Pakico Girls Represented in Tech? Durante e conferencia di dia di hende muher, Desiree Helder a trece estadistica padilanti caminda hende muhernan ta indica cu apenas 3 porciento di hende muher ta di opinion cu hende muher ta contribui den e sector di (tele) communicacion y solamente 5 porciento tin e opinion aki pa e sector di sciencia y investigacion. Cu e tech camp aki nos kier motiva mucha muhernan pa explora e mundo di tecnologia.
WOW kier sigura cu nos damanan sa cu den mundo profesional, nos damanan por kibra tur barera y domina den nan carera profesional den tur area. Women empOwering Women Aruba ta un organisacion local, estableci na 2017 cu e proposito di trece hende muhe hunto cu e lema di “network, learn and support each other”. Actualmente e organisacion ta conta cu 45 miembro. WOW a organisa diferente conferencia y tambe actividad anteriormente pa tur edad.
E mainta aki, nos lo ta presentando e topiconan di product management y agile way of working, di digital transformation, con tecnologia a cambia durante tempo, digital payments y con esaki a cambia e manera cu nos ta paga riba nos isla pero tambe mundialmente, un tiki di AI y software development y sin laga afor cybersecurity, cual ta un topico di suma importancia den e avanse tecnologico tumando lugar.
Nos camp lo ta presenta door di diferente talento ser femenino local, cualnan ta:
* Kristel de Nobrega di Centrale Bank van Aruba, kende tin un Phd den Cybersecurity
* Wendy Koffy di Aruba Bank, kende ta forma parti di e Management Team di Aruba Bank
* Lucienne Lacle di Aruba Investment Bank, kende tambe tin su mesun tech consultancy Opta Innova y ta un di e fundadornan di WIP, un directorio enfocando riba profesionalnan den tecnologia
* Lucia Werleman, di WEB Aruba N.V., kende tin amplio experencia no solamente den implementacion di tecnologia, pero tambe den e parti humano pa e adopcion di tecnologia
GRIT! Tech Camp ta tuma lugar dia 12 di oktober, di 9am pa 1pm na SETAR Conexion Center na Sero Blanco.
Ticket ta obtenibel riba Pay.aw y ta costa solamente 25 florin pa hobennan y 35 florin pa adultonan sea mayornan of docentenan cu ta interesa.
Pakico atende GRIT! Tech Camp?
* pa haya informacion valioso di profesionalnan kende a sobrepasa bareranan
* pa wordo inspira y empodera pa bay pa bo metanan
* Pa un experencia unico
* Pa conoce hende muhernan local kende ta exitoso den e mundo di tecnologia na Aruba
Nos ta invita e hobennan di Aruba pa join nos dia interactivo, caminda lo tin hapjes, coy bebe y sessionnan interactivo cu lo laga hobennan inspira y empodera.
Cu e conferencia aki, damanan di WOW Aruba kier ofrece e comunidad di Aruba, hende homber como hende muhe e oportunidad di atende un evento cu lo tin un impacto positivo den nan bida y den nan forma di desaroya nan mes.
Pa mas informacion por comunica directamente cu WOW Aruba via facebook: https://www.facebook.com/wowaruba/.
Organisacion WOW Aruba kier extende palabra di agradecimento na tur sponsor cu ta haciendo e evento aki posibel incluso DELTA BLUE, SETAR y ARUBA BANK!