“Pa Gobierno, OPPA ta un partner importante, y p’esey lo sigui den dialogo cu nan pa asina sigura cu nan ta haya oido di instancianan pa yega na solucionnan”
ORANJESTAD – Diaranson mainta Prome Minister Evelyn Wever-Croes a tene un reunion cu e Organisacion di Pensionadonan Publico Arubano (OPPA), hunto cu AZV y SVB pa atende un carta cu a wordo manda door di OPPA na Gobierno pa cu e preocupacionnan cu nan tin. E preocupacionnan ta entre otro: nan entrada; poder di compra; suma di pensioen; impuesto; e cuido di salud mirando cu e lista di espera pa dokter tin biaha ta hopi largo.
Basa riba e carta aki, Prome Minister a invita nan pa un reunion hunto cu señor Jacobs di SVB/AZV. E reunion tabata uno hopi positivo, na unda OPPA por a trece dilanti e testimonio di varios di nan miembronan cu en berdad ta hopi preocupante, mirando cu e lista pa nan por yega un specialista ta demasiado largo.
Señor Jacobs a indica cu AZV na e momento aki tin un situacion financiero positivo, sinembargo e specialistanan no ta facil pa haya. Di otro banda señor Jacobs a indica cu ora AZV puntra ta wordo bisa cu no tin lista di espera.
Prome Minister a indica, cu mirando cu tin dos version diferente pa loke ta trata cuido medico di nos pensionadonan, SVB/AZV lo bay sinta regularmente cu OPPA na mesa pa asina e preocupacionnan di e miembronan di OPPA por haya atencion di biaha. Esaki sigur ta un bon paso, pa asina yuda e grandinan drecha nan calidad di cuido.
Durante e reunion tambe a toca e tema di impuesto. E directora di Impuesto a reuni varios biaha cu OPPA y a duna e workshopnan necesario. Awor ta haci siguimento riba e palabracionnan cu a wordo haci. Sigur hopi bon pa tende cu akinan tin un relacion di trabou cu ta funciona, mirando cu OPPA a indica di ya caba ta mira un cambio den e trato cu DIMP ta duna na e pensionadonan.
“Na fin di dia, e preocupacionnan cu OPPA a trece dilanti ta loke nan ta tende di nan miembronan, y ta preocupacion cu ta biba den nos comunidad cu mester atencion. Mi ta aprecia cu un organisacion manera OPPA, cu ta consisti di pensioenadonan mes ta asisti nos grandinan. Esaki sigur ta e miho forma pasobra nan ta compronde e problematica pasobra nan mes ta bib’e. Mi ta hopi orguyoso di nan pa nan esfuerso y dedicacion den defende nos grandinan. P’esey pa Gobierno, OPPA ta un partner importante, y lo sigui den dialogo cu nan pa asina sigura cu nan ta haya oido di instancianan pa asina yega na solucionnan”, Prome Minister a expresa.
