Gabinete ta pone 80 miyon euro disponibel pa tres proyecto cu mester contribui na fortalece e fundeshi economico y aumenta e capacidad di e islanan Caribense pa para riba propio pia. Cu esaki ta realisa construccion di un haf nobo na Saba, ta drecha e infrastructura na Boneiro y ta aumenta siguridad di alimento riba tur e seis islanan.
Pa construccion di un haf nobo na Saba cu por resisti horcan y ta prepara pa futuro, den 2025 y 2026 tin en total 40 miyon euro disponibel. Pa mehora e red di caminda di Boneiro, gabinete ta destina 16 miyon euro. Ambos proyecto ta contribui na e capacidad pa para economicamente riba propio pia y ta duna un impulso na sectornan importante manera turismo. Pa garantisa cu Aruba, Corsou, Sint Maarten, Boneiro, Sint Eustatius y Saba riba termino ta menos dependiente di importacion di alimento for di exterior, gabinete ta pone ademas 24 miyon disponibel pa proyectonan cu ta contribui na aumento di siguridad di alimento.
Bon gobernacion y finanzas publico solido
Banda di e tres proyectonan aki, gabinete ta enfoca riba finanzas publico solido y bon gobernacion, pasobra esakinan ta contribui di manera sostenibel na e capacidad pa para economicamente riba propio pia. E Organisacion di Trabou Temporal (TWO) te cu 2027 ta keda asisti e Paisnan pa logra realisa finanzas publico solido, un gobierno fuerte, bon servicio publico, desaroyo economico y enseñansa na ordo. Den 2025 tin 30 miyon euro disponibel pa esaki. Pa garantisa siguridad y estado di derecho, gabinete ta sostene Aruba, Corsou y Sint Maarten cu inversionnan pa detencion, fortificacion di control di frontera y pa atende cu criminalidad subversivo. Cu esaki tin den 2025 en total 70 miyon euro meti.
Fortificacion di siguridad di existencia
Na Boneiro, Sint Eustatius y Saba tambe gabinete ta fortalece siguridad di existencia. Structuralmente gabinete ta haci € 2 miyon liber cu cua ta fortifica servicio (insular) riba tereno di pobresa y debe. Ademas ta destina structuralmente € 1 miyon pa cuminda escolar. Banda di esey gabinete kier fortalece forsa di compra di tanto mayornan, como personanan cu entrada minimo y entrada medio. Gabinete a reserva structuralmente € 8 miyon pa esaki. Riba termino cortico gabinete lo elabora mas aleu e detayenan exacto.