ORANJESTAD – Durante Conferencia di Gobierno di Aruba, dialuna 16 di september, Prome Minister Evelyn Wever-Croes a haci e anuncio cu Director di DOW, señor Marlon Croes ta tuma su retiro pa fin di 2024.
Señor Marlon Croes a traha 35 aña total na DOW di cual 20 aña el a sirbi Aruba como Director di DOW. Durante e 20 añanan Aruba a mira trabounan grandi wordo realisa bou di su liderazgo.
Aparte di e funccion di Director di DOW, tambe señor Croes a participa den diferente comision den diferente momentonan cu tawata importante pa Aruba. Tambe un cantidad grandi di proyecto valioso pa Aruba a wordo realisa durante e liderazgo di señor Marlon Croes. Pa menciona algun: E mudamento di Waf pa Barcadera, stacion di bus na LG Smith BLVD, rotondenan y e aplicacion di reglanan riba esaki y caminda grandi Tanki Flip y Pos Abou.
Despues di e anuncio di Prome Minister e director di DOW a dirigi su mes na e miembronan di prensa y a conta un tiki di su carera na DOW cu a cuminsa dia 16 di maart 35 aña pasa. Semper el a traha cu hopi satisfaccion y lo sigui traha cu e mesun gana cu el a traha semper te dia 31 di december.
“Mi ta gradici Minister President cu ken mi a traha cu hopi placer durante e ultimo añanan, tur ministernan, e personal di DOW cu ta un tremendo ekipo y semper mi a traha hopi bon cu nan. Y mi ta spera pronto, hunto cu Minister President, nos por apunta e sucesor di mi persona pa garantisa cu DOW por sigui crece y den futuro bira un departamento mas automatisa y mas digitalisa”, señor Marlon Croes a expresa.
Prome Minister ya gradici señor Croes den nomber di Gobierno y henter e comunidad di Aruba, pa e añanan di servicio dedica na Gobierno di Aruba, na e personal di DOW y na Aruba en general.