Pos Chikito – Savaneta , Diahuebs anochi pasa di 10’or informacion a drenta di un accidente serio poco pabou di La Granja Savaneta.
E biaha aki tawata trata di un accidente raro. Tawata trata di un accidente entre un Scooter y un bicicleta. Masho poco bo por scucha di un accidente asina aki.
Na e sitio nos a papia cu un testigo, cu a mira kiko a sosode. Segun e chauffeur locual e por a mira tawata cu e scooter a dal contra “algo”, e momento ey e no tawata sa contra kiko.
E la nota yen cos spart y cu e scooter a bay ariba e manehador, posiblemente su cabes. Locual e la dal contra dje tawata un bicicleta.
Ambos homber a resulta herida, cu golpi na cabes. Pero, esun mas serio tawata e motociclista, cu por a mira cu su cabes tawata hincha for di un angulo.
Polis a cera e caminda, mirando e momento tawata tin bastante tráfico.
Polis di trafico tambe a presenta, pa investiga ta con e accidente aki a sosode.
Dos ambulance a presenta, unda cu e prome ambulance a sali cu urgencia direccion Hospitaal cu e motociclista y na ultimo a sali cu e ciclista.
Caminda a permanece cera pa algun rato, unda cu tanto compania di seguro y polis por a haci nan trabou.
Famia di ambos partido a presenta y a bay cu tanto e bicicleta y e scooter.
