“Boso ta e testimonio di determinacion, fortalesa y curashi”
ORANJESTAD – Diaranson mainta 21 di augustus, a tuma luga e entrega di certificado na e di dos grupo di dama cu a completa e trayecto di Formacion Social, Social Vormings Traject (SVT). Prome Minister Evelyn Wever-Croes hunto cu Minister di Husticia y Asuntonan Social, señor Rocco Tjon tawatin e honor di haci e entrega di certificado na e damanan.
E trayecto di Formacion Social ta un oportunidad unico pa damanan hoben cu ta pasando den momentonan dificil y ta enfrentando retonan, descubri y forma habilidadnan pa ta exitoso den bida. E ta yuda nan crea un fundeshi di disciplina y responsalibidad den nan bida diario. A traves di e trayecto di Formacion Social e damanan ta haya guia, sosten y tambe nan ta core stage pa asina prepara nan pa diferente carera, ampliando asina nan chens di haya un trabou den futuro.
Prome Minister ta indica cu ta un orguyo grandi pa Gobierno di Aruba di a logra amplia e trayecto tambe pa hende muher. Tempo cu Gabinete Wever-Croes a sinta, Formacion Social tawata existi caba pero solamente pa cabayero, cual actualmente ya ta na grupo#18. Pero e Formacion Social pa damas ta algo nobo cu e Gobierno actual a traha duro p’e y a logra, kibrando asina e barera y crea mas oportunidad pa e hende muhe na Aruba. Tawata un proyecto cu a tuma su tempo pero awe ya por wak e frutonan cu e graduacion di grupo#2.
“Mi ta sumamente orguyoso di e grupo di seis dama hoben cu awe a finalisa e curso. A entrega cinco certificado awe ya cu un di e damanan ya a biaha pa Corsou unda e lo sigui e opleiding di militar. Durante nan biahe na Corsou, e damanan aki di Formacion Social a haci asina bon impacto, cu ya caba un di nan lo cuminsa un carera como militar na e hermana isla.
Un danki na Marinierskazerne, na mi coleganan minister di Gabinete Wever-Croes, y sigur na juffrouw Jessica pa sa di guia e grupo aki. Pabien na tur e graduadonan, boso ta e testimonio di determinacion, fortalesa y curashi. Hopi exito den futuro”, Prome Minister a expresa.