Internacional Raceway Park Palomarga pronto lo keda inaugura.
ORANJESTAD: Recientemente, Minister Endy Croes a reuni cu e miembronan di directiva di Arubaanse Bond van Motorsports (ABM), kendenan ta atende cu Palomarga. Durante e encuentro, a trata diferente punto cu ta pendiente pa asina finalisa cu e proyecto di renobacion di e pista di Palomarga den su totalidad. Tambe directiva di ABM a presenta diferente fecha cu wordo aporba pa careda di drag race por tuma luga. Minister Endy Croes a indica cu e ekiponan cu falta pa finalisa cu e trabou, esta “compound” e pista ta na caminda pa Aruba. Ta premira cu e ekiponan lo ta Aruba fin di luna di augustus y asina por cuminsa programa careda na Palomarga. “Nos ta contento di por a reuni cu e tres miembronan di ABM, kende a duna informacion di e ultimo desaroyo na Palomarga. Nos a duna nos aporte, sosten y guia pa e proyecto aki por wordo finalisa den su totalidad. Pueblo di Aruba por disfruta di careda di drag race riba un pista acredita na standard internacional, alabes e miho pista di Caribe”, Minister Endy Croes a conclui.