Pronto e proyecto di renobacion ta completamente finalisa.
ORANJESTAD: Recientemente, Minister Endy Croes a acudi na St Aloysius School na Noord pa mira e ultimo avancenan di e proyecto di renobacion. E mandatario di Enseñansa a ricibi un rondleiding pa wak e ultimo desaroyonan di e proyecto di renobacion. Durante vakantie escolar, a instala e “smart board” nobo den 9 klas lokaal. Den e fase di innovacion y digitalisacion esaki sigur ta hunga un rol importante pa e hobennan cu ta custuma cu tecnologia, cual ta e “way to go” den futuro. “Nos ta hopi contento pa mira cu e proyecto di renobacion di e scol ta den su fase final y nos ta contento di a forma parti y aloca e fondonan necesario pa tanto pa e renobacion den su totalidad y un gymzaal nobo. Pocopoco ta agrega tur e rekisitonan cu falta pa asina nos por duna un miho calidad di enseñansa na e hobennan cu ta bishita e scol aki,” Minister Endy Croes a expresa.
Cabesante di St. Aloysius School Sr. Vladimir de Cuba a indica cu e alumnonan ta contento cu porfin e renobacion di e scol a tuma luga. Tin algun detaye ainda cu ta finalisando, pero ta hopi agradecido cu Minister Endy Croes a haci su esfuerso, a inverti su tempo y a aloca e fondonan pa yuda logra diferente proyecto, entre otro e “smart board” cu ta agilisa e proceso di duna les y un propio gymzaal, cual ta nan soño di mas grandi. “Porfin e muchanan por haya les den fresco y no ta wordo exponi den e solo cayente. Nos ta hopi contento cu esaki. Ademas di esaki, a drecha e speelplaats, unda cu a elimina e problema di awa completamente.
Sr. Micheal Lampe, kende a lidera e proyecto di “smart board” di e scol, a indica cu e ta un deseo cu e scol tabatin pa basta tempo pa tin nan propio “smart board”. Esaki lo haci e lesnan hopi mas atractivo pa e alumnonan y lo yuda e maestronan duna e instruccion den un ambiente mas agradabel. Den nomber di e meastronan di St Aloysius School, Sr. Lampe a gradici Minister Endy Croes pa yuda nan realisa e proyecto aki y sigur nan lo haci un bon uzo di dje.
Por ultimo, Minister Endy Croes ta felicita tur esnan cu a trek e proyecto aki. “Na tur studiante hopi exito den e aña escolar 2024 – 2025. Na tur docente, maestro y esnan den e tereno di enseñansa hopi pasenshi y sabiduria. Nos ta balora boso trabou masha hopi mes, danki pa educa e yiunan di e pueblo aki”, Minister Endy Croes a finalisa. Hopi exito!