“Nos tin miles di pesionado cu problemanan grandi di sobrebibencia y pobresa. Nos tin centenares di nos grandinan wardando pa por drenta un cas di anciano. E problema di sushi a bira un epidemia den tur bario na Aruba. E situacion di rioleerlingnan cu ta pasa over y ta haci nos un isla manera un Pais di tercer mundo cu problema di sanidad y higiena. Tur ta cai bao di reponsabilidad di Minister Ursel Arends y e Minister aki ta pone como prioridad pa crea discordia y friccion cu 430 taxista y nan famia cu ta biba di nan labor diario como embahador di hospitalidad y cordialidad di Aruba”. Esaki tabata e promer reaccion di Lider di Oposicion, mr. Mike Eman, na prensa despues di un reunion hunto cu colega ing. Mike de Meza cu un delegacion di taxistanan.
Mr. Mike Eman a expresa condena fuerte pa e accion di Arends, cu apoyo di henter conseho di minister. Segun e lider politico, e manera con a cambia regla ta un muestra cla di falta di compasion pa e ciudadano, di un maneho inconsistente y di un triki pa sigui yuda mas di nan mesun hendenan.
Pa ilustra e posicion di AVP den e asunto aki, Mike Eman a comparti e ehempel di un amigo taxista Tico Croes (dfm) cu na su entiero, e di dos rij tabata consisti di amigonan Canades cu a biaha djis pa despedi di dje y compaña e famia, demostrando e relevancia di taxistanan como embahadornan di nos isla. Tambe a referi na e echo cu Croes no tabatin un yiu pa traspasa e permiso di taxi, pero kier a pas’e pa un ruman cu lo a sigui percura pa su famia. Esey ta un boluntad cu e gobierno actual no a coopera cu ne.
Eman: “Ta totalmente inhusto e incorecto pa un persona cu tin 60 aña, cu no a bouw op un pension, cu a conta cu dia e bira grandi, e por transferi e vergunning pa un yiu di dje of familiar, awo no tin e opcion ey mas. Si bo kier trece cambio, sinta cu tur taxista y mira tur posibilidad.” E lider di AVP no ta kere cu e minister cu ta encarga cu medio ambiente y asunto di adulto mayor, mester enfoca tanto riba taxista, mientras cu a crea sushedad tur rond Aruba cu clausura di dump y tin e grandinan ta biba un bida inhusto. “Bo tin hopi otro cos di drecha,” asina Eman a bisa den direccion di Minister Arends.
Esaki no tin nada di bon gobernacion den dje, segun Eman indicando con rapport di Raad van Advies un biaha tras di otro ta conseha pa bin cu un fase di transicion ora di haci cambio drastico den maneho. Taxista cu 60 y 70 aña no tin pension, ni otro forma di haya un garantia di existencia. Sea permiti pa pasa permiso pa un familiar cu lo percura pa nan famia of bin cu otro sistema di pension. Mientras tanto, Evelyn Wever-Croes atrobe ta hunga di ciego sordo y mudo, cu e no sa di nada. Sinembargo, e realidad ta cu Aruba tin problema hopi mas grandi y no por ta dedicando tempo y energia na algo cu no ta kibra.
Eman a califica e posicion di Gabinete Wever-Croes como uno totalmente incorecto. E mocion di MEP y RAIZ di december pa cambia e posicion di taxista no ta evita corupcion, pero ta pa habri caminda pa por beneficia atrobe nan mesun hendenan. “Nos kier wak e lista cu Ursell Arends tin pa parti, nos kier wak si el a crea un forma transparente di aplicacion, si e ta bay duna otro hende oportunidad pa aplica,” mr. Mike Eman a bisa. E no ta kere den e integridad cu ta yena boca cu ne, pasobra tur dia ta enrikece famia. MEP y RAIZ tur dia ta kita di pueblo y duna amigo y famia y esey ta loke awor kier haci tambe cu taxista.