Aruba Airport Authority N.V. (AAA), manehado y operado di Aeropuerto di Aruba, ta contento pa anuncia e firmamento di un contract nobo cu ABO Projects VOF. Esaki ta un aliansa forma pa Algemeen Bouwbedrijf “Albo Aruba” N.V. y Bouw- en Handelsmaatschappij “Bohama “Aruba N.V.. E asociacion aki ta encarga cu e construccion di Fase 1B, cu ta un paso significativo pa cu e expansion y modernisacion andando di e facilidadnan na e terminal di Aeropuerto di Aruba.
Despues di e entrega recien di Fase 1A, cu lo ta operacional na comienso di aña 2025, lo inicia cu Fase 1B dia 16 di october 2024. Ta anticipa cu e fase aki lo por dura mas o menos 24 luna y lo conta cu:
- Expansion y renobacion di e sala di espera existente na Gate 8, mehorando e comodidad y experiencia di e pasahero mas ainda
- Construccion di un un edificio nobo cu tres porta di salida. Esaki lo inclui infrastructura y tecnologia di ultimo generacion pa aumenta e capacidad di cada sala di espera y capacidad pa tin gate cu jet bridge y mehora e servicio di salida y yegada en general
- Salanan di espera nobo pa e edificio nobo y jet bridges pa e gatenan, brindando oportunidad pa e uzo eficiente di espacio pa un fluho di pasahero sin problema .
- Construccion di un conexion pa conecta e edificio di aeropuerto existente cu e edificio nobo, garantisando acceso y conexion facil entre e terminalnan .
- E facilidad nobo lo inclui tres porta remoto nobo di bus na “ground floor” cu lo inclui caminda y acceso na rampa, di e manera aki lo haci e operacion di bus remoto mas eficiente
- Construccion di infrastructura adicional pa benta y F&B den e edificio nobo, ofreciendo mas opcion di compra, cuminda y bebida prome cu e pasaheronan bandona nos isla
- Tur loke a menciona ariba, lo inclui caracteristica di sostenibilidad cu lo inclui panel solar, pa energia di e “airside” y reuzo di awa condensa pa promove practica ecologico.
AUA Airport ta entusiasma pa inicia cu e siguiente fase di proyecto Gateway 2030, ya cu esaki lo mehora su habilidad pa sirbi e aerolineanan partner, pasahero y henter e comunidad di aeropuerto. Mas ainda ta hopi orguyoso di inicia e proyecto aki cu envolvimento di companianan local, cu ta brinda mas oportunidad di trabou na nos isla pa e area den construccion, ingenieria y mas.
E proyecto aki ta enfatisa e compromiso di AAA pa modernisa e infrastructura di AUA Airport y mehora e experiencia general di biahe y cumpli cu e demanda creciente pa Aruba.
Tocante AUA Airport
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 78% ta di Merca y Canada, 14% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport