Aruba no por sigui wanta mas carga financiero!
Awor cu nos ta na apenas algun dia for di e fecha di eleccion, ta e momento apropia pa reflexiona riba e ultimo 8 añanan di Gabinete Mike Eman y specificamente pa locual ta e inversionnan cu a wordo haci den infrastructura di e pais aki. Esaki ta mas cu logico, mirando con CFT den su rapport di 29 december 2014 a declara cu menos cu 1%, esta 0.8% di e gastonan total di gobierno a ser usa pa inverti den e pais aki.
Proyectonan PPP
E declaracion aki di CFT ta hopi alarmante ya cu te ainda AVP no a splica na kico a ser gasta e restante di 99.2% aki. Locual si nan ta hopi bon den dje ta di gaba riba tur e inversionnan den e proyectonan PPP, manera Hospital, Green Corridor, Watty Vos Boulevard y e 5 edificionan MFA, cualnan tur ta proyectonan cu na e momento aki nan gastonan absolutamente NO ta core riba presupuesto di gobierno ya cu lo bay cuminsa paga esakinan un parti den e aña aki y e otro den e proximo 25 pa 30 aña. Ya na 2017 ta cuminsa paga 6.3 miyon pa e Green Corridor, na 2018: 16.8 miyon y durante 25 aña largo e suma di 16.8 miyon. Pa loke ta e Hospitaal ta cuminsa paga na 2017: 24 miyon y den e proximo 29 añanan lo sigui paga 24 miyon tur aña. Watty Vos Blvd lo cuminsa paga esaki na 2018 e suma di 8.5 miyon, na 2019 e suma di 22.8 miyon florin y den e proximo 25 añanan lo sigui paga e suma aki di 22.8 miyon florin. Pa loke ta e 5 MFA-nan lo mester paga 3 miyon florin tur aña y esaki durante 25 aña. Sinembargo pa loke ta e PPP-nan, gobierno te ainda no kier splica con nan tin pensa di paga esakinan, esta di unda lo saca e placa. Pero no ta importa nan tampoco, ya cu manera custumber nan ta laga e desaster aki pa e proximo gobierno di MEP resolve, mescos cu tabata e caso na 2001.
Ningun construccion
Asina un y tur por mira con e gobierno aki a inverti y pa gran parti por medio di crea debe y mas debe pa e proximo generacionnan paga. Pero pa loke ta e demas infrastructura den e pais aki, fuera di embeyece algun bario cu asfalt y klinkers, practicamente nada a ser haci riba e tereno aki. Asina por mira cu durante e ultimo 8 añanan e gobierno di AVP, contrario na e maneho di inversion dinamico di e gobierno di MEP, no a inverti den construccion di ningun cas social, a construi solamente un scol, no a construi ningun facilidad deportivo, ningun warda di polis, ningun cas pa anciano y ningun centro medico. Tur esakinan lo mester ta proyectonan pa yuda un gran parti di nos comunidad, nos hobennan, nos grandinan, nos deportistanan y nos pashentnan.Sinembargo locual partido MEP ta haya hopi remarcabel ta cu e gobierno di AVP no tabata tin ningun problema pa inverti den e areanan menciona mirando e echo cu nan a hereda un suma di 970 miyon florin cu a ser laga atras pa Gabinete Oduber na final di 2009. Fuera di esey nan a fia y sigui fia y esaki a yega na un suma extra di 2 biyon florin na debe. Ta p’esey, cu awe tin miles di ciudadano cu no por haya un dak riba nan cabez ta pa motibo di AVP. Cu awe hopi mucha no por haya cupo na scol ta pa motibo di AVP y asina por sigui.
Pues laga e siman aki ta un siman di reflexion pa bo wak unda nos pais tabata para na 2009 y con e situacion ta na e momento aki. E rumbo desastroso cu nos pais ta bayendo awor aki mester wordo cambia inmediatamente y poni den e direccion corecto.