ORANJESTAD – 19 di juni 2024: Aruba Marriott Resort & Stellaris Casino a celebra cu su asociadonan for di dia 3 te cu dia 7 di juni. E hotel a organisa diferente actividad, for di canta bingo, bowling, haci trabou pa comunidad y paintball, cada actividad tabatin un acogida grandi di parti di e asociadonan di Aruba Marriott. Diadomingo anochi a clausura e Associate Appreciation Week na Balashi Beer Garden despues di un tremendo “car rally.”
Ruthline Theysen, Complex Director di Recurso Humano na Aruba Marriott, a comenta cu e siman di aprecio a cuminsa riba dialuna cu partimento di dryfit shirt y c’un “food truck festival.” Mainta trempan e asociadonan a hunga bingo. Ademas, un di e actividadnan tabata encera pa sirbi comunidad, aki e asociadonan a bay St. Michael Paviljoen pa haci algun actividad cu e grandinan, haci trabou di hardineria y drecha e cushina.
Un di e eventonan organisa pa e asociadonan tabata Global Running Day, paintball, un “overnight party” dedica specialmente na e asociadonan cu ta traha te anochi laat. Riba diabierna tabatin un dia di famia. Pa Aruba Marriott ta importante pa dedica e dia aki no solamente na e asociadonan pero tambe na nan famia como muestra di gradicimento na tur famia cu ta sostene e asociadonan.
Durante e “family day” Aruba Marriott tabatin Balashi Beer Garden pa nan so. Aki tabatin un area special dedica na mucha, unda a parti cotton candy, por a bula den dino jump y participa den varios actividad pa mucha. P’e grandinan tabatin entretenimento cu e banda Buleria y cu un brassband. Ademas, e bar y cushina tabata bon surti p’e asociadonan y nan famia disfruta.
Den dia tabatin un “car rally” caminda un total di 38 auto a participa. Tabatin premio di 1500 florin pa esun cu a keda na prome luga, 1000 florin p’e di dos luga y 750 pa e di tres luga. Durante anochi a rifa un total di 8000 mil florin na premio entre e asociadonan di Aruba Marriott.
“Masha masha danki na tur e asociadonan di e compleho cu ta un total di 1300 asociado. Nos ta hopi orguyoso di nan tur, nan ta e exito di e compania”, asina Ruthline Theysen a expresa cu masha orguyo. E ta un satisfaccion pa Theysen y henter e team di recurso humano cu a dedica mas cu un luna di preparacion pa e Associate Appreciation Week.
Aña pasa, sin duda algun, tabata e miho aña pa e compleho di hotelnan Marriott na Aruba. Pero pa por a maneha e crecemento aki, a depende hopi di e asociadonan. Y esaki cu e realidad cu asociadonan ta scars, pues tin varios funcion habri di cual ainda ta buscando pa recluta. P’esey, hopi biaha, e personal den servicio mester a duna extra di nan mes pa por a mantene e nivel halto di servicio cu Marriott ta conoci p’e.
Si abo ta buscando trabou, no pensa dos bes den solicita na Aruba Marriott Resort. Ey ta traha cinco bes pa siman, ta paga un salario competitivo, cu un lista di beneficio pa e asociado y su famia, sin lubida bonus di un salario completo pa fin di aña. Tambe asociadonan di Marriott por keda na un prijs preferencial unda nan biaha rond mundo y hospeda den un otro Marriott.
Tocante Aruba Marriott Resort & Stellaris Casino
Aruba Marriott Resort & Stellaris Casino a habri na aña 1995 cu 411 camber y a añadi tres camber na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. Na tur, e famia di Marriott Aruba ta consisti di mas o menos 1300 empleado den servicio directo. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.
