Tin 10 factor cu ta infleuncia bestaansminimum (costo di bida). E 10 factornan ta: 1. Cuminda y bebida, 2. Paña y sapato, 3. Gastonan di vivienda, 4. Acesorionan pa cas, 5. Salubridad, 6. Transporte, 7 Comunicacion, 8. Recreacion, cultura y desaroyo, 9. Educacion, 10. Otro bienes y servicionan.
E canasta basico ta consisti di 11 producto cu e prijsnan ta wordo stipula y controla pa gobierno. E productonan ta: aros, hariña, sucu, babyfood, lechi pa baby, koffie, te, margarina, manteca, lechi di polvo y lechi liquido pa koffie.
Banda di e canasta basico, prijsnan cu tambe ta wordo calcula pa gobierno ta: pisca, galiña, webo y pan blanco.
Locual cu ta insera salario minimo y e bestaansminimum tin un diferencia hopi grandi pa luna. Un persona cu ta gana salario minimo ta bin cu ne rond di Afl 1650,- pa luna. Na luna di july e bestaansminimum ta pa:
- un adulto Afl 2.053,-.
- dos adulto y 2 yui Afl 4.311,-.
Cual cu ta señala e motibo pa kico salario pa luna ta jega y mester traha extra pa por cubri cu gastonan di luna.
Como cu e debe di pais Aruba a bin ta crece, cada bez a bin mas impuesto y obligacion pa e comerciantenan. Nos a conoce por ehempel BBO y BAZV, pa medio di aumenta edad di pensioen comerciantenan mester paga 1 % mas riba AOV / AWW, aumento di salario minimo. Cada aumento di impuesto y obligacion, e comerciante ta pone den su prijs. Cual cu ta hasi cu e aumentonan lo aumenta e prijs riba e factornan cu ta influencia bestaansminimum.
Locual ta trata pa amplia canasta basico, mester evalua bon si lo ta un desicion responsabel. Actualmente e canasta basico y productonan cu nan prijs ta wordo controla, ta pertenece na cuminda y bebida. Cual cu ta un di e factornan cu ta influencia e bestaansminimum. Pa medio di amplia e canasta basico ta hasi cu comerciantenan lo mester bay hisa prijs riba otro productonan of corta den nan gastonan. Corta den gastonan ta un decision hopi indesea, pa e motibo cu empleado ta un di e peso mas grandi cu comerciante tin den su finansas. Pa es motibo mester evalua unda tin espacio pa amplia canasta basico, den cua di e factornan y con hopi por wordo amplia.
Pa baha gastonan di gobierno y aumenta entrada mester traha tanto riba e dos factornan, cu ta finansas publico y economia.
Pa mehora e economia y mehora entrada, POR lo:
- Expande turismo cu e fast ferry entre Aruba, Boneiro y Corsou.
- Introduci e curason di Fourth Industrial Revolution, cual ta pasa riba tecnologia moderno.
Pa traha riba finansas publico POR ta enfoca riba:
- Refinanciamento di e debe nacional.
- Reduci e cantidad di minister y colaboradornan.
- Reorganisa nos aparato gubernamental.
- Elimina mal uzo y malgastamento di fondonan publico.
- Reforma y reforsa organonan di conseho y control.
Pa medio di baha gasto y aumenta e entrada di gobierno, lo tin menos impuesto y obligacion pa e comerciantenan. Cual cu ta brinda e oportunidad pa bende su producto y/of duna un servicio na un miho prijs. Cual cu ta hasi cu costo di bida lo ta baha. Y pa medio di mehora economia, lo bay crea empleonan cu miho salario cu ta brinda pueblo un mihor poder di compra.