Minister Xiomara Maduro di Cultura tin na su encargo e maneho riba monumentonan di nos Pais. Den practica e maneho aki ta wordo ehecuta pa Monumentenbureau cu ta identifica y documenta edificionan y sitionan cu tin balor unico pa humanidad, ta percura pa nan mantencion y restauracion, y ta promove pa proteha y preserva nos monumentonan como herencia cultural di Aruba y humanidad. Banda di esaki Monumentenfonds Aruba tambe ta activo cu su meta principal pa busca fondo pa mantene y restaura e monumentonan di nos Pais. Aruba ta conta tambe cu un Monumentenraad cu ta evalua y duna aprobacion necesario ora ta haci mantencion y restauracion na momumentonan di Aruba. Actualmente tin cuater edificio monumental cu ta wordo renoba den nan gloria, pa nan por conta nan historia. Ta trata di Maria Convent, Warda di Polis na Savaneta, Cas Veneranda y Ex-edificio di DOW.
Maria Convent
E edificio di Maria Klooster conoci como Maria Convent ta data di aña 1920 y tabata hospeda e Soeurnan di Dominicanessen di Voorschoten. E kapel di e klooster a ser agrega na aña 1946. Despues cu e klooster a cera na aña1980, e edificio a ser entrega na Gobierno di Aruba. Na aña 1995 a cuminsa e trabou di renovacion y na aña 1996 e Ministerio di Cultura y Departamento di Asuntunan di Exterior a muda pa e edificio aki. E edificio aki a conoce un renovacion y awo e monumento Maria Convent ta hospeda e facultad di ‘Sustainable Island Solutions through Science, Technology and Mathematics’ (SISSTEM) di Universidad di Aruba. Esaki ta e di dos fase di e proyecto di SISSTEM cu ta wordo financia cu fondonan di Union Europeo hunto cu e yudansa di United Nations Development Program (UNDP). Esaki lo yuda forma studiante cu e conocemento pa logra un desaroyo sostenibel di Aruba y pa mundo.
Warda di Polis Savaneta
E monumento conoci como Warda di Polis Savaneta tambe ta wordo restaura den su gloria pa asina por bolbe sirbi como oficina pa Cuerpo di Polis di Aruba. E edificio aki a wordo traha den añanan 30 pareu cu e ‘Politiepost’ nan di Oranjestad, San Nicolaas y Noord.
Cas Veneranda
Den centro di cuidad ta tumando luga e renobacion di Cas Veneranda cu ta den proceso pa bira momumento oficial di Aruba. E edificio a wordo construi na aña 1936 pa sr. Merdado ‘Dada’ Picus riba instruccion di sr. Federico Maximiliano ‘Machi’ Arends pa su casa sra. Maria Veneranda. E arkitecto Dada a bay Cartagena, Colombia pa wak un cas estilo neobaroco di latinoamericano cu e casa di sr. Machi Arends tabata gusta pa construi Cas Veneranda den mesun estilo. Den e tempo ey Cas Veneranda tabata un di e casnan mas grandi y cu un arkitectura unico na Aruba. Cas Veneranda a conoce hopi funcion, e tabata cas di famia Arends, despues e tabata tambe un luga cu tabata bende ijscream, di Mama Ocha, yiu di sr. Machi y sra. Maria. Machi tabata comerciante y consul di Spaña y asina e cas aki tambe a fungi como oficina di consulado di Spaña. Despues di algun tempo Cas Veneranda a bira un discoteque “Club Noveau” y na aña 1978 sr. Irwin y sr. Martin Tauber a habri Papiamento Restaurant akinan. Den añanan 80 e restaurant a cambia di maneho y famia Ellis a bira doño di e restaurant y e restaurant a muda pa otro luga. Despues cu restaurant Papiamento a muda, e edificio a keda bashi y na aña 2014 un candela grandi a destrui e plafond y dak y tambe acabada di algun muraya.
E renobacion ta den ful swing pa asina pronto por sirbi como oficina pa Departamento Economico di Gobierno di Aruba.
Ex edificio di DOW
E edificio aki a wordo diseña pa DOW na aña 1949 den un estilo nobo di arkitectura comercial pa por ubica e oficinanan di DOW aden. Durante e temporada ey cu establecimento di Lago, economia di Aruba a crece y consecuentemente e trabounan administrativo y e trabounan na DOW tambe a aumenta. Esey a trece cune cu DOW mester a muda pa bay un edificio mas grandi y moderno. E edificio aki a wordo construi pa e contratista Ramon Montaner y a wordo construi den dos fase. E parti banda pazuid (L. G. Smith Blvd) a wordo construi den e prome fase y e parti cu ta duna pa Paardenbaaistraat a wordo construi den e di dos fase na aña 1954. Un caracteristica notabel di e arkitectura entre 1930 y 1950 tabata cu e daknan cu panchinan di dak cu ta di ceramica tabata sali for di e gevel di e edificionan. Door di scarsedad di material di construccion door di Segundo Guera Mundial e daknan tabata wordo cubri cu panchinan di metal, eterniet y asfalt. E edificionan construi durante e periodo aki tabata construi teniendo cuenta cu clima. E fachada ta traha pa laga luz y aire pasa, proteha riba e calor di e solo pa controla e clima paden di e edificio. E edificionan aki a wordo construi cu arkitectura conoci como ‘DOW architectuur’ y ta forma un grupo di arkitectura apart di e construccion cu nos conoce normalmente na Aruba. Poco dia atras, e edificio di Ex-DOW a keda traspasa pa su doño nobo, Aruba Ports Authority cu lo percura pa renoba e edificio monumental aki pa e por bira oficinanan pa APA, ATA y Monumentenbureau. E monumento aki lo hospeda ATA su ‘Visitor Information Center’ super moderno cu lo por brinda informacion na nos turistanan cu ta den centro di cuidad.
Conserva pa conta Aruba su historia
Minister Maduro di Cultura ta gradici tur persona y instancia cu ta percura pa Aruba su monumentonan por wordo renoba y conserva, ya cu nos monumentonan ta parti importante di Aruba su herencia cultural. Cada monumento restaura den su gloria, lo percura pa conta su storia y e historia di Aruba.
