Mas cu estetica, e ta mas bien un asunto di salud y bienestar.
Den e ultimo decadanan, gran parti di e campaña di salud a enfoca hopi ariba obesidad y e necesidad pa perde peso. Sinembargo, ora nos bira mas grandi, ta mas importante pa mantene nos musculonan cu baha peso.
E motibo? For di nos 30 aña di edad, aunke poco poco, un proseso natural di perdidada progresivo di masa y forsa muscular ta cuminsa.
Pa ora nos yega 50 aña, nos ta cuminsa cu un perdida di masa muscular mas grandi ainda, cu por yega na 2% anualmente.
E perdida di musculo aki, conoci como sarcopenia, por causa un disminucion di e capacidad funcional, ci ta bira un riesgo mas halto di sufri un caida y descapacidad.
“Ora nos bira bieu, falta di musculo por causa mas daño cu e cantidad di vet na nos curpa”, geriatra Mericano Gabrielle Lyon ta bisa.
E ta splica cu mantene nos musculonan lo yuda nos keda autonomo y independiente.
E desaroyo di masa muscular tambe ta yuda preveni algun malesa cronico manera obesidad, diabetes tipo 2, hipertension of malesa cardiovascular.
Kiko nos hasi anto? E miho ta, pa esnan cu ta tuma nan prome paso pa sali for di sedentarismo, ta pa inclui ehercicio den nan rutina gradualmente. O sea poco poco.
Ademas, ta recomenda pa tin e guia di un profecional di educacion fisico pa e por diseña un plan cu ta efectivo y mas importante ainda den caso di hende di edad y of hende cu nunca a haci nada, pa evita lesion y caida durante ehercicio.