ORANJESTAD, Aruba – 6 di juni 2024: “Bingooooo”, esey t’e grito cu por a scucha den ballroom di Aruba Marriott Resort & Stellaris Casino durante un evento special pa tur asociado den e “Associate Appreciation Week”. Algun shen asociado di e hotelnan Marriott Aruba Resort, Marriott Surf Club, Marriott Ocean Club y Stellaris Casino a uni den un mainta con organisa, bunita decora y cu hopi ambiente di colegialidad.
Jeslin Wever, Director of HR Operations di Aruba Marriott Resort & Stellaris Casino a duna di conoce cu e siman aki ta yena di eventonan, tin biaha hasta dos bes pa dia. E departamento di recurso humano ta reconoce tur e bon trabou cu e asociadonan ta desplega durante henter aña y ta organisa un siman pa nan cu hopi actividad.
Entre e eventonan organisa, tabatin tambe un “neon bingo”. Tur aña e wega di bingo ta conta cu masha interes di e empleadonan, pero e aña aki a opta pa dun’e un toke extra door di hacie den ambiente di colornan neon. Henter e actividad tabata den estilo “glow in the dark”. Gerencia a pone mas di tres mil florin disponibel na premio pa tur cu a hunga bingo.
Mester bisa cu obviamente e mas di 1300 asociadonan na Aruba Marriott Resort & Stellaris Casino ta considera e hotel nan cas y nan coleganan ta manera famia. Esaki pasobra centenares di asociado a uni durante e evento, cu a bay compaña pa un dushi desayuno, prepara pa gerencia di e hotel mes, pa tur asociado presente.
Un siman di actividad
E actividadnan di e aña aki a cuminsa desde dialuna atardi, den cura di Aruba Marriott mes, unda a instala cuater truck di cuminda, pa cushina pa tur trahado. Diamars a cuminsa e dia cu un Neon Bingo Event, den cual 400 asociado a pone nan nomber pa participa y hunga Bingo. Durante e bingo tabatin desayuno y hopi premio. Riba e mesun dia aki pero parti atardi e asociadonan a bay Paviljoen pa hunga bingo y haci trabou den hardin como muestra di aprecio y pa duna bek na comunidad.
Riba diaranson Aruba Marriott tin un Global Running Event di 5K of 10K pa e asociadonan. Riba e mesun dia aki pero parti anochi lo tin un Crazy Bowling na Eagle Bowling. E dia siguiente lo tin paintball y un overnight event cu lo tuma luga na Goza Bar pa tur e asociadonan cu ta traha e shift di anochi. E evento lo clausura cu un car rally dedica na famia cu lo cuminsa 3:00PM y caba 6:00PM den Balashi Beer Garden cu entretenimiento di e agrupacion musical Buleria.
Aruba Marriott ta e miho dunado di trabou na Aruba
Aruba Marriott tin hopi beneficio pa tur asociado. Ta considera Aruba Marriott como e miho dunado di trabou aki na Aruba. E empleadonan ta conta cu diferente beneficio, por ehempel den luna di december tur a haya henter un luna extra di salario como holiday bonus. Den luna di december cada asociado a ricibi un gift card balora na 250 florin y ademas a rifa mas di 30.000 florin na premio. Esaki ta djis un ehempel di loke nan a haci den luna di december so, aunke cu henter aña tin actividad pa e asociadonan pa mantene un bon ambiente.
Aruba Marriott ta haci diferente actividad social pero tambe fisico pa su asociadonan. E ta un compania cu asociadonan ta traha solamente cinco biaha pa siman y ta conta cu beneficio di cobertura di gasto di bril y dentista. Un di e beneficionan di mas atractivo ta e descuento cu tur asociado ta haya ora cu nan biaha y keda na cualkier Marriott rond mundo.
Si abo ta interesa pa traha cerca e miho dunado di trabou na nos isla, bo por subi https://careers.marriott.com/ y busca Aruba pa evalua tur e posicionnan cu tin disponibel.
Tocante Aruba Marriott Resort & Stellaris Casino
Aruba Marriott Resort & Stellaris Casino a habri na aña 1995 cu 411 camber y a añadi tres camber na 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. Na tur, e famia di Marriott Aruba ta consisti di mas o menos 1300 empleado den servicio directo. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.
