ORANJESTAD – Awe mainta te den oranan di atardi, Hof di Corte Superior a dedica na interogacion di sospechosonan di bendemento di tereno erfpacht cu a haya di Gobierno. Den e articulo aki ta dedica na e caso di bendemento di terenonan na Eagle Beach na razon di 3.8 Miyon Dollar. E sospechonan ta Gaby Werleman , su señora Nuñez y Carlo Mansur .
ARUBA NATIVE por a compronde cu Hof a señala cu Benny Sevinger, minister di AVP, tabata firma documentonan sin controla.
TERENONAN NA EAGLE BEACH
Hof a mustra cu Werleman y Nuñez a haci peticion na Gobierno AVP na 2014 pa un tereno na Eagle Beach pa realisa un proyecto di apartamento pa turista. E proyecto ta yama Damira. Hof a mustra cu envez di a haya un tereno di 3 mil meter cuadra manera a pidi, Werleman y Nuñez a haya un tereno mucho mas grandi.
Mansur, cu a pidi un tereno tambe na Eagle Beach di mas o menos 5 mil meter cuadra, a haya un tereno di 4250 meter cuadra. E proyecto ta yama Lizner.
Hof a mustra cu for di investigacion di Landsrecherche ta sali na cla cu dia 10 December 2014, Werleman di Damira a haci peticion y algun dia despues, 12 December 2014 Sevinger a aproba e peticion. Dia 24 September 2015 a uni dos protectonan Damira y Lizner. Ta asina cu e proyectonan aki a wordo bendi hunto pa 3.6 miyon dollar y a reparti esaki entre Werleman, Nuñez y Mansur. Gaby Werleman a splica Hof cu e tin 3 proyecto di apartamento y tabata kier un proyecto pa turismo na Eagle Beach. E tabata kier mas o menos 3 mil meter cuadra pa un compleho di 15 apartamento.
HOF CU PREGUNTANAN SKERPI
Hof a puntra pakico, Werleman a haya mas tereno cu loke el a pidi. Segun Werleman, e no a puntra pakico. Hof a puntra Benny Sevinger, kende a bisa Hof cu esey ta decision di DIP cu a midi tereno caba. Hof a remarca pakico un dama cu a pidi 1500 meter cuadra y despues 3 mil meter, no a haya pero Werleman si. Sevinger a bisa cu e no sa y cu esey ta maneho di DIP.
Nuñez a bisa cu formal e tabata director di Damira. Nan kier a traha un compleho di apartamento. Ora e tereno a bira mas grandi su casa Werleman a bisa pa busca un partner. Werleman a busca otro inversionista, Henriquez di Spacio. Werleman a bisa Hof cu e y Nuñez tabata director y despues a forma e NV. El a bisa cu Nuñez tabata mas encarga cu e administracion.
Ta asina cu Werleman tabata consehero di Gobierno AVP y Benny Sevinger.
Hof a cuminsa haci Mansur preguntanan y Mansur a bisa cu e no tin contacto priva cu Sevinger manera Landsrecherche ta bisa sino relacion comercial. Mansur a bisa Hof cu el a duna declaracion bon cla na Landsrecherche. Hof a puntra si e kier papia y Mansur a para riba cu e ta para tras di su declaracion.
TERENONAN A WORDE REGLA CU URGENCIA
Hof a mustra cu e hefe na DIP a haya straño cu e peticion a wordo firma asina liher. Normal ta tarda hopi. Segun Sevinger, e ta firma peticionnan normal. Hof a mustra cu un dama a declara cu e tabatin combersacion cu Werleman kende a bisa cu e por yud’e cu tereno si e haya 5 porciento. E dama a nenga di paga. Werleman a bisa Hof cu no ta berdad.
Hof a mustra cu tabatin stempel “spoed” riba e peticionnan. Segun e hefe di DIP, ta minister Sevinger so ta haci esey. Segun Sevinger, ta na DIP ta haci esaki. El a bisa cu esey a sosode promer cu su tempo y ainda e ta mira e stempel “spoed” riba peticionnan.
Hof a mustra cu Landsrecherche tin un decreto di minister firma pero sin fecha pa e proyecto. Sevinger a bisa cu e no sa di esey. Ta asina cu Werleman a paga pa e opcion di tereno pa Mansur. Hof a puntra pakico. Segun Werleman el a fia Mansur e placa. Hof a reacciona pakico Werleman a paga y no Mansur mes. Ta asina cu Mansur a bin cu e cumprador Donati pa e dos proyectonan.
MINISTER TA FIRMA SIN CONTROLA
Hof a puntra Sevinger con por ta cu Sevinger ta firma peticionnan y cartanan di DIP sin sa kico ta contenido di esaki. Segun Sevinger el a encarga tur cos na DIP y loke DIP dicidi e ta firma. Hof a remarca cu Sevinger no ta controla nada ni promer ni despues si ta duna tereno. Hof ta haya cu esey ta un risico cu Sevinger ta tuma di firma cosnan sin sa. Segun Sevinger, pesey e tin e departamentonan cu e ta confia. Hof a remarca cu Abath a bisa cu nan no ta haci nada sin Sevinger ta na altura.
Hof a mustra Sevinger e peticionnan di Demira y Lizner caminda el a aproba esaki y manda pa DIP. Hof ta haya straño cu Sevinger ta djis firma sin mira e contenido. Segun Sevinger e ta bay di acuerdo cu e peticionnan y ta DIP tin cu dicidi.
CARTA CU INFORMACION FALSO
Hof a mustra riba un carta di Damira cu lo busca inversionista pa participa den e proyecto mientras cu Donati ta papia di cumpra e proyecto. Nuñez a bisa Hof cu e abogado a traha e carta y el a firma. Hof a remarca cu si firma, e ta responsabel pa esaki. Hof a bisa cu aki ta trata di mas cu 3 Miyon Dollar. Hof ta haya cu esaki ta duna informacion falso di loke realmente tabata sosodiendo. Abogado mr. Oomen di Werleman y Nuñez a mustra Hof cu tin un otro carta caminda ta splica con e bendemento di e proyecto a tuma lugar y traspaso di accionnan. Hof a remarca cu e cartanan ta mustra cu ta un proyecto ta wordo lanta, siendo cu Donati ta bisa cu el a cumpra e proyecto. Hof a remarca cu dia 9 December 2016 Abath a declara na Landsrecherche cu Sevinger a aproba e bendemento di e proyectonan na Donati siendo cu e traspaso di accionnan a sosode 8 December 2016, un dia promer. Abath ta señala cu minister Sevinger a tuma decision riba traspaso di proyecto, sin cu DIP a tuma un decision riba esaki. Segun Abath, DIP lo tabata kier sa, kende lo tuma e proyecto y otro informacionnan.
Sevinger a bisa Hof cu su maneho tabata pa proyectonan keda realisa mas liher pa drecha economia. Hof a remarca cu si a laga Donati paga 24 mil florin pa e opcion, e lo tabatin mas placa pa inverti den e proyecto cu a laga Donati paga 3.6 miyon dollar. Sevinger a bisa Hof cu esey ta asunto di esnan cu a bende y e no tin nada di bisa den esey.