Awe mainta trempan gerencia di Aruba Ports Authority NV a ricibi un e-mail di sindicato FTA cu lo tin un reunion cu algun empleado. E confusion a surgi ora cu a tuma nota cu no tabatin un reunion pero mas bien un grupo di empleado a “walkout” dilanti edificio di APA hunto cu e representenan di FTA.
Recientemente gerencia di APA a firma un contracto colectivo di trabou (CAO) cu sindicato FTA y cu e tempo ey a expresa di ta satisfecho cu ne. Asina mes toch a interumpi e trankilidad laboral awe ora cu 13 empleado a bay para pafo di oficina di APA NV.
Gerencia di APA NV a tuma nota di algun expresion treci dilanti cu no ta cuadra cu realidad. E operacion maritimo di waf ta supervisa estrictamente door di instancianan local y internacional. APA NV ta tene su mes y ta cumpli debidamente cu tur e regulacionnan stipula y ta percura pa un operacion sigur. APA NV ta confirma cu e ta manteniendo su mes na tur palabracion haci den e CAO firma recientemente.
Mester bisa cu APA NV semper a hiba un dialogo y comunicacion habri y sincero cu tur empleado. E porta di gerencia di APA NV semper ta habri y frecuentemente ta hiba combersacion formal y tambe informal cu tur empleado, incluyendo shop stewardnan di e sindicato. Esaki sigur no lo cambia y ta keda pendiente pa e comunicacion di parti di FTA pa compronde kico e preocupacionnan ta y asina por sinta na mesa pa bay over di esaki (nan).
Tocante Aruba Ports Authority:
A funda Aruba Ports Authority N.V. na aña 1981. E compania ta pertenece 100% di Gobierno di Aruba y tin 80 trahado den servicio directo. Hunto ta maneha e dos wafnan di Aruba, pues tanto esun di crucero na Oranjestad como tambe esun di carga na Barcadera, unda nan tin un acuerdo di operacion cu ASTEC. Pa aña ta yega mas o menos 330 crucero na Oranjestad y na tur ta suma mas o menos 900 barco, incluyendo esunnan di carga na Barcadera (sin conta barkitos y launch services). E compania ta stabiel y ta bou maneho di Marc Figaroa.