Cla pa contesta tur pregunta of suministra informacion na pashent of clientenan
ORANJESTAD, Aruba: Pa Inspectie Volksgezondheid Aruba (IVA) tabata un dia special diahuebs ultimo, ora a inaugura nan oficina nobo. E celebracion a bay den un ambiente ameno cu tur invitado y empleadonan contento di mira e localidad nobo. Inspector General di IVA ta mr. Dorylee Pappers-Lopez Penha, kende hunto cu su team a traha duro pa asina por a yega e localidad.
Ta importante pa e pueblo di Aruba sa unda por yega cerca nan y cu e departamento di IVA t’ey pa brinda asistencia, pero tambe pa cualkier keho cu por tin y nan sa precies unda pa bay. E momento di e apertura tabata uno hopi special pa tur trahado di e departamento.
Meta di IVA ta pa tin un laso estrecho cu tur otro departamento y ta traha cu tur partner den cuido. Hunto cu e partnernan, IVA lo desaroya pero tambe controla y supervisa cu tur partner den cuido ta tene nan mes na e normanan.
“Partnernan importante pa nos ta por ehempel Ministerio Publico, unda cu nos lo traha den estrecho cu nan”, mr. Dorylee Pappers-Lopez Penha a indica. Trahando hunto cu nan ta pone cu IVA por discuti casonan cu ta bin cerca nan.
Inspector General a manda un mensahe na comunidad di Aruba cu si un hende como pashent of cliente tin cualkier pregunta of falta di informacion pa loke ta e cuido di Aruba of tin keho riba cuido brinda nan nan, cu nan por pasa cerca nan. IVA t’ey pa duna e ayudo y duna guia den e direccion corecto.
Despues cu Parlamento a aproba su creacion y a pasa e leynan corespondiente di control y sancion, desde dia 1 di januari 2017, Inspectie Volksgezonheid Aruba a bira un realidad y mescos ta e leynan cu a drenta na vigor. Pa por garantisa cu tur partner envolvi ta consciente di e normanan, e reglanan y e sancion nan mara na e control riba calidad, a topa cu tur durante varios seminario.
Inspectie Volksgezondheid Aruba (IVA) ta un organo cu ta encarga cu control di calidad y siguridad den nos cuido medico. Pero mas aleu tambe lo e sirbi como consehero pa Minister di Salud y e Ministerio di Salud y e sector completo, o sea, e centro unda tur cos lo mester pasa pa asina yega na e nivel di calidad y siguridad cu tin mira riba dje.