Ta un echo cu cada mucha cu ripiti aña escolar, ta costa pais Aruba placa y nos no ta ni sikiera papia di e carganan emocional y psicologico cu esaki tambe tin riba e mucha y cu e no ta haya oportunidad di un educacion igual. Reduci e cifranan di keda sinta ta un di e retonan mas grandi cu nos sistema di enseñansa ta confronta cu ne y ta di lamenta, cu gobierno actual no ta wak den e direccion aki.
Actualmente den e scolnan basico regular e porcentahe di keda sinta ta entre 7% pa 12%. Segun investigacion di UNESCO, Aruba ta top den e islanan di region, pa loke ta trata e porcentahe di mucha cu ta keda sinta den klas 1. Remarcabel ta, cu klas 1 ta e base solido pa un mucha siña lesa y skirbi y esaki ta sosode den un idioma stranhero Hulandes y no den e idioma nacional Papiamento. Kiermen cu maske e cantidad di tempo dedica na Hulandes pa e muchanan siña lesa y skirbi den klas 1 ta halto, esaki no ta dunando un resultado di miho dominio di Hulandes. Alcontrario, nos ta pushando nos muchanan pa crea un disposicion desagradabel pa loke ta trata siñamento, specialmente lesamento. Incluso varios investigacion a indica cu keda sinta no lo mehora e resultado den nan desaroyo academico y por tin efecto negativo durante henter su carera academico.
E muchanan cu ta keda sinta tin e tendencia di sinti menos di nan capacidad, ta score abou riba ahustacion personal y psicologico y ta refleha mas problema cu disciplina. Algun entrevista clinico cu studiante, cu a keda sinta, a indica cu nan ta sinti rabia y malo y tin miedo di e reaccion di famia y amistad. Incluso algun di nan a experiencia tentamento di bisiña of amistad y a indica cu nan tin dificultad pa ahusta na scol despues.
Keda sinta tambe tin conexion fuerte cu dropout di scol. Un mucha cu keda sinta tin cinco biaha mas chens pa drop out for di scol, compara cu esunnan cu nunca a keda sinta. Entre 2009 y 2013, un averahe di 10% di alumno entre klas 1 te 5 a keda sinta na Aruba, cual ta un cifra basta alarmante y sigur pa cuestiona, dicon ni Minister di Enseñansa, Departamento di Enseñansa of Inspeccion di Enseñansa no a tuma accion y bin cu solucion na bienestar di nos futuro generacion. Un mucha cu keda sinta dos of mas biaha, tin casi 100 porciento probabilidad di comberti den un dropout, compara cu un mucha cu tin prestacion abou, pero cu ta haya guia structura y completo. “Aña pasa Minister di enseñansa a bin cu un maneho, unda cu a dicidi cu no ta laga niun mucha keda sinta den klas 1 na e scolnan di gobierno, pero kico ta e plan di maneho y guia pa e muchanan aki? No a presenta absolutamente nada concreto y con realmente lo mehora e situacion aki, cu sigur tin un impacto riba formacion di nos comunidad”, Sue-Ann ta enfatisa.
Fracaso escolar tambe tin conexion cu participacion den comportacion di riesgo di salud (uzo di cigaria, alcohol y arma relaciona cu violencia) pa adolescente, segun un data di National Longitudinal Study of Adolescent Health. P’esey mes partido MEP tin su vision tocante enseñansa bon delinea, unda cu cada mucha ta central y nos lo percura pa bin cu un maneho di sistema di enseñansa holistico y cu realmente ta beneficia tur nos mucha- y hobennan y asina crea un comunidad sostenibel y bon studia.