Riba dia di Himno y Bandera, Cas di Cultura a habri su portanan pa henter comunidad di Aruba. E team dinamico di e plataforma cultural a prepara un programa di actividad interactivo pa grandi y chikito.
Cu e ayudo di e hobennan di Key Club di Colegio Arubano, Cas di Cultura a converti e sala di exposicion den un area di obra di man, unda cu muchanan por a traha instrumento musical, pinta e bandera di Aruba, traha auto di careda cu carton, hunga teatro di sombra y pinta cara.
Pa exactamente 12’or di merdia, e coro Novi Cantores, dirigi pa sr. Lodewijk de Cuba, a presenta Himno di Aruba, cual e publico presente a ricibi cu gran emocion.
Parti pafo di e edificio, e chikitinnan a bula y gosa den dino jump, mientras cu mayornan por a cumpra limonada fresco y disfruta di e mercado di artesania.
Un obra musical cu a ricibi hopi complimento,ta “Amigonan di Cunucu” cu a wordo presenta pa meneer Jaderick, meneer Darrell y meneer Dwayne. Amigonan di Cunucu ta un obra musical interactivo cu a wordo presenta pa prome biaha na November 2023. E interes pa ripiti e obra aki tabata grandi y pa e motibo aki Cas di Cultura a opta pa present’e riba nos dia nacional.
Cas di Cultura ta gradici tur esnan cu a haci nan un bishita riba dia di Himno y Bandera y ta bisa danki na tur boluntario y su miembronan di staff full time y part time cu a traha cu hopi entusiasmo pa deleita pueblo di Aruba. Un danki special ta bai na e sponsornan cu a haci e
Festival di Sopi posibel, incluyendo The Old Cunucu House, Barefoot Restaurant, Bingo Bar & Restaurant, Aruba Wine & Dine, Matthew’s Beachside Restaurant, Windcreek Aruba, Casa Tua. Famia Werleman y Famia Van Den Heuvel.
