ORANJESTAD – Departamento di Labor y Investigacion (DAO) ta recorda tur dunado di trabou riba nan invitacion pa participa den e encuesta digital relaciona cu nan experiencia trahando cu hobennan riba e mercado laboral. Ta brinda un oportunidad pa participa te cu 28 di maart 2024.
DAO a inicia cu e encuesta 29 di januari 2024 y ta duna oportunidad pa participacion te cu fin di maart. E encuesta ta brinda dunador di trabou e oportunidad pa contribui informacion valioso cu por uza pa yuda durante e desaroyo di un maneho laboral, un accion cu por resulta den cambionan positivo pa e actividadnan empresario.
E obhetivo di e investigacion aki ta pa haya un bista mas amplio di e experiencia di e dunado di trabou cu e grupo di hoben disponibel riba e mercado laboral. Esaki ta encera hoben di 15 pa 24 aña di edad, y tambe e hoben adulto di 25 pa 29 aña di edad riba e mercado laboral di Aruba.
E investigacion aki ta encera e compilacion di informacion riba entre otro e proceso pa recluta y empleo di e hoben trahado for di bista di Aruba su dunadornan di trabou. E datonan aki ta contribui na e identificacion di e areanan di nos mercado laboral cu ta rekeri intervencion di maneho laboral.
Nos ta pidi encarecidamente pa participa na e encuesta aki cu lo tuma mas o menos 15 minuut di bo tempo. Aki por encontra e linknan pa participa.
Version na Hulandes di e encuesta
https://www.surveymonkey.com/r/SWTS2024NED
Version na Ingles di e encuesta
https://www.surveymonkey.com/r/SWTS2024ENG
Participacion den e investigacion aki ta completamente boluntario. Lo publica tur informacion y dato ricibi na forma agrega, asegurando proteccion di identidad di e dunado di trabou. Pa mas informacion tocante e encuesta, por tuma contacto cu Bureau Arbeidsmarktonderzoek, na 5237720 of por manda un email pa [email protected] of [email protected].
Nos ta gradici bo pa bo tempo y boluntad pa contribui na e investigacion importante aki. Bo empresa su participacion ta aporta grandemente na e desaroyo di e maneho laboral como tambe intervencionnan pa mehora oportunidadnan di empleo pa hobennan. Nos ta pidi bo cooperacion pa completa e encuesta prome cu 28 maart 2024.