ORANJESTAD: En conexion cu Dia Internacional di Lenga Materno riba 21 di februari, Minister di Enseñansa Endy Croes y colega Minister di Cultura Xiomara Maduro a atende exposicion Visualisando Dicho y Proverbio cu a tuma luga na UNOCA. Un bunita exposicion, unda rond di 55 mucha di alrededor 33 scol basico a presenta nan pintura y proverbio. Minister Endy Croes a hiba palabra y a enfatisa riba e importancia pa tin bon dominio di lenga materno. Lenga materno ta e prome idioma cu un persona ta siña durante su crecemento. Momento cu un persona ta domina su lenga materno adecuadamente, ta enrikece su propio identidad cultural. Segun investigacion, ora cu un persona ta domina su lenga materno, esaki ta trece varios efecto positivo cognitivamente. Un mucha por siña otro idioma hopi mas lihe, momento cu e tin bon dominio di su lenga materno.
Ta celebra Dia Internacional di Lenga Materno cu e meta di stimula diversidad linsguitica, cultural y multilingual. Aki na Aruba nos ta celebra e dia aki pa promove nos dushi Papiamento y pa trece consciencia den nos comunidad tocante e importancia di tin un bon dominio di nos lenga materno. Tambe pa resalta e importancia pa un mucha siña den su propio idioma na scol. Globalmente, 40% di populacion no ta haya les den e idioma cu nan ta papia of compronde. Segun The United Nation Education and Scientific Cultural Organization (UNESCO), un mucha cu ta siña den e idioma cu nan ta papia na cas, tin 30% mas probabilidad pa lesa cu comprension den comparacion cu esnan cu no ta papia e idioma di instruccion na cas.
En cuadro cu recomendacion 2 di e rapport Doorlichting van het Arubaanse Onderwijsstelsel, lo introduci Alfabetisacion na Papiamento e aña escolar binidero, unda cu tur alumno di klas 1 di scol basico di Aruba lo siña lesa y skirbi na Papiamento. Pues, esaki ta un gran logro pa enseñansa di Pais Aruba.
Durante e discurso, Minister Endy Croes a pidi pa hunto enrikece y sigui siña nos futuro generacionnan pa mantene nos idioma materno Papiamento bibo. Como un pais multicultural y multilingual, nos ta duna balor na tur idioma, pero ban sigui haci esaki sin laga nos idioma materno atras, cual ta forma parti di nos identidad. Ban celebra Dia Internacional di Lenga Materno en grande y sigui promove y aprecia nos idioma Papiamento. Finalmente, Minister Endy Croes a felicita UNOCA, UNESCO y Fundacion Lanta Papiamento pa organisa e tremendo exposicion Visualisando Dicho y Proverbio, en conexion cu Dia Internacional di Lenga Materno y a gradici tur esnan cu a contribui den e desaroyo di nos dushi idioma Papiamento.