E siman aki Prome Minister Evelyn Wever-Croes a reuni cu e Commissie Versterking Democratisch Bestel. Esaki ta un comision cu Minister President a institui na 2018 cu e fin di fortifica e fundeshi democratico di Aruba.
Na aña 2017, ora cu a drenta gobierno a constata cu e colegionan halto di estado a wordo debilita door di accionnan delibera di e gobierno anterior. Un ehempel ta e colegio di Algemene Rekenkamer cu e gobierno anterior a nenga di nombra 2 di e 3 miembronan y asina e colegio aki no por a emiti ningun resultado di investigacion cu nan a haci.
Consecuentemente rapportnan manera Bo Aruba y otronan a sali te despues cu Gabinete Wever-Croes I a sinta na fin di aña 2017 despues di a nombra e 2 miembronan cu tawata falta pa completa e colegio di Algemene Rekenkamer. “E forma di proceder aki di e gobierno anterior ta mina nos democracia y ta debilita e fundeshi riba cua nos pais ta construi. Un procedura cu ta protege corupcion y esey ta algo cu nos kier evita”, Minister President a remarca.
Pa e motibo aki desde 2018, hunto cu e Commissie Versterking Democratisch Bestel a cuminsa riba e independisacion di e colegionan halto di estado. A cuminsa cu Raad van Advies y a termina esey 2 aña pasa. Despues a traha riba e fundeshi pa e instituto di Ombudsman (Defensor di pueblo) cu lo wordo institui e aña aki y awor ta trahando riba independisacion di Parlamento y Algemene Rekenkamer (Controlaria General), creando asina e fundeshi pa checks and balances na pais Aruba. “Asina e ciudadano por sinti’e trankil cu tin control debido ta wordo eherce riba gobierno y accionnan di gobierno. E trabounan ta continua y ohala nos por finalisa e independisacion di Parlamento y Controlaria General pronto. E lo ta un bunita legado pa logra un democracia aun mas fuerte pa nos pais”, Prome Minister a expresa.