Dialuna 15 di januari 2024 nos ta yama un ultimo ayo na un gran baluarte di nos Pais cu nos por a conoce den su trabou como periodista, locutor, escritor, maestro di ceremonia, historiado, gran culturista y enciclopedia bibo di Carnaval di Aruba, sr. Hubert Cornelis Naar, miho conoci den nos comunidad como Jubi Naar.
Conoci pa mas cu un nomber
Den transcurso di su bida di 80 aña, Jubi tabata conoci bou diferente nomber. Algun conoce como Cornelis of na manera mas chistoso Chuchubi. Otronan ta corda Jubi pa su famoso columna ‘Baul di Hucona’, y tabata yame Hucona, cu ta e nomber forma pa e di dos prome letternan di su nombernan y faam. Jubi a haci su mes famoso cu e columna ‘Popo’ cu e tabata scirbi den e Matutino ‘DIARIO Aruba,’ den cual Jubi diariamente tabata suministra informacion di tur acontecimento di Carnaval, y pa e motibo aki Jubi tabata conoci como Popo bou di e carnavalistanan di Aruba. Via emisoranan tambe Jubi tabata hopi activo, entre otro, na Radio Carina FM, Jubi tabata e ‘mastermind’ tras di e show di ‘Popito’, cu tabata e version cortico di informacion carnavalesco di Popo na radio. Di eynan Jubi tabata conoci den comunidad tambe bou di e nomber Popito.
Un periodista pa mas di 50 aña
Jubi tabata envolvi den e mundo periodistico di Aruba y a aporta na varios corant na nos Pais. Na edad di 11 aña Jubi a cuminsa bende e corant semanal ‘The Local,’ cu ta un corant na Ingles cu tabata wordo publica tur siman riba diabierna na San Nicolas. Jubi a cuminsa skirbi hopi jong durante cu e tabata bay scol, e tabata skirbi articulo na Ingles pa e corant ‘The News’ cu tabata un corant masha popular na Aruba. Jubi tabata gusta traha relato riba deporte tambe. Na jong Jubi tabata hopi activo den deporte di, entre otro, basketball, baseball, futbol, y esaki a inspira Jubi, kende tabata tin e habilidad di capta cosnan durante weganan di un manera fenomenal, pa traha su relatonan na final di e weganan. Den decada setenta Jubi a traha tambe pa e corant ‘Prome’ cu tabatin su sede na Savaneta. Jubi a cuminsa traha na DIARIO na aña 1980. Eynan Jubi tabata enfatisa e importancia pa e periodista- y redactornan skirbi Papiamento na forma corecto, haciendo uzo di e reglanan di ortografia di Papiamento aproba na 1976. Na aña 1986 Jubi a bay yuda startup e publicacion nobo di ‘Matutino Corant.’ Na aña 1988 el a yuda startup Aruba su prome corant di atardi, ‘Meridiano.’ Na aña 1990 Jubi a bay traha bek na DIARIO pa asina reforza e redaccion. En total, Jubi Naar tabata den periodismo na Aruba pa mas di 50 aña.
Un locutor profesional
Jubi tabata conoci tambe den e mundo di locucion na nos Pais. Na jong Jubi a cuminsa traha na e studio di Radio Antillana riba e frecuencia 1270 AM cu tabata sitia net patras di Lago Heights Club. Durante tempo di prueba di transmision, Jubi tabata bay pa cende e transmisor (‘zender’) tur atardi, pa asina e emisora cuminsa transmiti y despues anochi pa 11:00 pm, Jubi tabata bay pa paga e transmisor ora cu e programacion finalisa. Despues cu a inaugura e radio, Jubi a traha como locutor na Radio Antillana te ora ela logra haya un beca di Gobierno pa bay studia na Hulanda. Eynan Jubi a bay traha y studia na Radio Nederland y na De Nederlandse Televisie Stichting. Na e ultimo aki, Jubi a studia tur cos cu tin di haber cu radio y television. Jubi a studia tambe ‘filmregie’ y transmision di eventonan en bibo. Banda di esaki tambe Jubi a studia produccion, con pa traha script, balansa di sonido, tur aspecto di traha cu actornan, team di produccion, y tambe con pa traha un presupuesto pa evento. Despues cu Jubi a bin bek Aruba, ela traha na emisora Voz di Aruba riba 1320 kHz AM, na ‘Rijksvoorlichtingsdienst’ di Gobierno, y na Telearuba, unda e tabata locutor y tabata presenta noticia.
E escritor y maestro di ceremonia cu curason pa nos cultura
Sr. Jubi Naar tin algun publicacion riba su nomber, como cu e ta un persona cu ta gusta lesa y skirbi. Jubi tambe tabata encanta skirbi libreto cu storianan pa asina inclui nan den obranan teatral, y den decada di 1980 a fortalece su grupo yama ‘Cabaret Picante’, cu a yena salanan yen den Cas di Cultura. Jubi tabata crea humor net ora cu comunidad tabatin mas mester di dje. Jubi su envolvimento den Teatro tabata grandi, y tabata sinta combersa cu oranan largo cu expertonan den e tereno aki. Su pasatempo preferi tabata ‘Mascaruba’, unda cu por a discuti y papia riba trendnan di teatro, na un nivel mas halto cu djis crea algo di comedia. Y ora di ta presenta riba escenario, Jubi tabata bay tin biaha e ‘extra mile’ pa haci hasta actonan fisico sin sa si acaso e lo finalisa anochi cu pia of braza kibra, pero tanten cu a entretene publico. El a skirbi varios buki y a haci hopi research riba e origen di Carnaval. Jubi a skirbi hopi tambe riba e gruponan di Steelband di Aruba. Jubi tabata un gran amigo di Instituto di Cultura y Departamento di Cultura. E tabata anfitrion pa evento ‘Bon Bini Festival’ tur diamars anochi na Fort Zoutman for di 1985 te cu 2010 unda e tabata entretene e turistanan cu historia di Aruba y su chasconan. Jubi hunto cu Baba Charlie tabata encabesa JUBU (JUbi y BAba) Production. Nan organisacion a organisa diferente evento rond di Aruba. Hunto cu Instituto di Cultura nan a trece e gran cantante Sparrow Aruba pa haci presentacion y organisa charlanan riba e tema di Calypso. Jubi tabata maestro di ceremonia pa mas di 60 aña pa actividadnan tur rond di nos isla. P mas di 30 aña, Jubi tabata e maestro di ceremonia pa Festivalnan di Calypso & Roadmarch, y tambe Tumba Contest.
Den su bistimento tambe Jubi tabata mustra su amor pa nos cultura. Sin duda alguno, publico a mire na diferente ocasion ta cana bisti cu su ‘Kashaka’, cu el a laga patenta na su estilo cu un diseño di 1885, y a pone riba nan varios dibuho tipico di Aruba. Algo admirable y cu sigur a pone hendenan reconoce Jubi ya for di un kilometer leu.
Enciclopedia bibo di Carnaval di Aruba
Jubi Naar semper a wordo considera door di hopi hende como un berdadero ‘Enciclopedia bibo di Carnaval di Aruba.’ Pa e motibo aki mes Jubi tabata e persona cu mas tabata wordo busca door di scolnan, pa duna lectura encuanto cierto aspectonan di Carnaval. Jubi a crea pa DIARIO, e famoso ‘Popo’ cu a bira e columna mas gusta di Carnaval. Locual a cuminsa como un chansa, cu e intencion di suministra humor di tur dia pa lectornan, a desaroya bira un fuente informativo importante di Carnaval di Aruba, yena cu detaye di e temporada. Tin biaha Popo tabata asina largo, cu e columna tabata cubri 3 te hasta 5 pagina. Como cu Jubi tabata wordo considera e persona cu wowo critico pa Carnaval, pa hopi aña durante SAC y cu Milio Croes (d.f.m.) como lider, a duna Jubi e tarea pa fungi como President di Hurado pa e Paradanan Grandi di Carnaval di Playa y San Nicolas. Jubi tabata encarga pa busca miembronan di hurado, duna nan un curso relampago con pa observa tur carosa, roadpiece, bodypiece, y cumplimento di musica, y asina tabata yuda e cuerpo di hurado bira mas fuerte riba caya. Jubi tabata miembro activo tambe di e Federacion Europeo di Carnaval, FECC, y tabata viaha pa e paisnan Europeo pa cumbrenan cu ta ser teni pa cu topico di Carnaval, representando e Carnaval di Aruba.
Palabra di condolencia
Minister Maduro ta manda palabra di condolencia na Jubi su famia, amistadnan, ex-coleganan y specialmente na e mundo cultural di Aruba cu semper a aprecia Jubi pa su aporte y dedicacion sin igual na Carnaval di Aruba. Cu Jubi Naar sosega na Paz den Reino di Todopoderoso.