Politica ta un arte y ora algo ta bon pa Bo pais ta na su luga pa Bo persona como un parlamentario primordialmente di e mesun districto sostene e proyectonan cu ta bon pa Bo districto. Secretario General di MEP ta lamenta masha hopi cu algun parlamentario no ta compronde nan rol como representante di pueblo y na tur momento kier practica e politica bieu di boycottea y bay contra tur locual ta bon pa nan propio pais solamente pa e hecho cu Bo ta den oposicion. Den oposicion tambe kiermen Bo por contribui! Dialuna 12 di december 2023, Parlamento di Aruba a trata e Presupuesto Supletorio 2023 di Pais Aruba. Minister di Enseñansa Endy Croes e dia aki a presenta publicamente un proyecto noble y bunita, esta un Juliana Mavo School completamente nobo cual lo wordo construi den districto di Paradera.
Gerlien Croes a boycottea e proyecto:
Den e Presupuesto Supletorio cu a wordo trata y aproba pa Parlamento dialuna 12 di december, Parlamento a aloca un espacio financiero di 6.7 miyon florin pa Gabiente Wever Croes II y e dicho Minister di Enseñansa y Deporte Sr. Endy Croes por cuminsa cu e construccion di un Juliana School nobo nobo den Paradera. En realidad e proyecto aki tabata cla den e fase preparatorio y solamente tabata tin mester di fondo como cu desde december 2022, e minister encarga tabata preparando esaki. Frapante tabata momento di votacion den Parlamento di Aruba pa sea aproba of desaproba e suma di 6.7 miyon florin pa e construccion di un Juliana Mavo School nobo den Paradera, e nobato Parlamentario Gerlien Croes a boycottea e proyecto aki totalmente y a vota CONTRA. Esaki a cay manera un baño di awa friu pa esnan cu tabata sigui e reunion aki, pero danki na e sosten di 12 parlamentario kendenan si a aproba e 6.7 miyon pa un Juliana Mavo school den Paradera esaki lo bira un realidad. Mester remarca cu tanto Aguanette Gunn y Marisol Lopez Tromp pero tambe e fraccion chikito di AVP a vota contra e Juliana School nobo na Paradera. Ta evaluando si lo invita Gerlien Croes pa e ceremonia di ponemento di e prome piedra den aña 2024 pa asina publicamente kisas e pidi un disculpa na Paradera!
Gerlien Croes a comete un eror politico grave door di vota contra:
Gerlien Croes un politico hoben, kende tin tambe un apodo como La Reina del Sur, cual por cierto no ta un apodo mucho positivo, a comete un eror politico grave door di a vota contra e construccion di un Juliana School Mavo nobo na Paradera. Durante e debate den Parlamento di Aruba, Parlamentario Gerlien Croes tabata masha negativo. Ni cuanto Minister di Enseñansa y Deporte Endy Croes y diferente otro coleganan a suplica Gerlien Croes pa reevalua su posicion y pensamento y sostene e Presupuesto Supletorio 2023 pa asina e garantisa un Juliana School nobo den Paradera, Gerlien no a recapacita. Gerlien Croes representante di disctricto di Paradera den Parlamento di Aruba a vota CONTRA esaki. Fraccion di MEP na final a considera e actuacion y votacion di Gerlien Croes contra e bunita proyecto aki uno repudiabel y alabes un eror politico grave. Esaki sigur ta un mancha riba e carera politico di Gerlien Croes y tempo lo mustra con pueblo lo responde a traves di nan voto riba e acto negativo di Gerlien Croes. Bo por ta politicamente den desacuerdo cu Gobierno di Aruba y sigur cu MEP den e caso aki como cu ta un proyecto di Gabinete Wever Croes II y kisas pasobra ta un Minister di MEP a presenta e proyecto bunita aki. Pero Bo sano huicio mester por diferencia si kico ta BON pa un pais. Un Juliana School den Paradera y e prome MAVO school den Paradera ta un necesidad y ta brinda un oportunidad na tur hoben den e vecindario. Pues esaki no mester wordo ataca cu weganan politico y mucho menos pa un parlamentario cu ta bin di Paradera vota CONTRA un proyecto positivo y noble pa su propio districto. Bo por haci politica, pero nunca hunga cu sentimento di pueblo pa rasonnan politico. Partido MEP ta lamenta e hecho cu pa falta di experencia y guia politico Gerlien Croes ta cay den wega di AVP, Marisol Lopez Tromp y Aguanette Gunn unda tur a vota CONTRA 6.7 miyon pa construccion di un Juliana Mavo School. Un cos ta sigur den e prome 6 lunanan di aña 2024 e prome piedra pa e proyecto aki lo wordo poni y construccion lo inicia. Danki na e sosten di 12 parlamentario cu a sostene y aproba esaki.