Oranjestad Aruba
E di 33 Annual Speedo Winter Championships, organiza pa Plantation Swim Team na Florida a tuma lugar dia 7 te cu 10 di december.
Mas cu mil atleta di diferente pais, incluyendo Caribe, a participa.
Durante e competência di landamento aki e atleta Ocean van Loon, di e team local Stingray Swimming Team Aruba, a hasi un tremendo trabou deportivo y a logra di trese cas diferente medaya, 5 den total, 2 di oro y 3 di zilver, incluyendo un trofeo high point pa e di 3 lugar den su grupo di edad (13-14). E pool na Plantation Florida ta na yarda y no na meter manera akinan na Aruba. Esaki tabata un reto difícil pa Ocean, pero el a maneha e situacion y a logra un resultado excepcional.
Recientemente Ocean a wordo nomina y a gana e Premio Excelencia den Deporte como e atleta di mas destaca y excepcional den su categoría di edad U13 2022. Su abuelonan Jan y Ria van Loon a bin te Aruba pa e ocasión special aki. Nan ta 80+ den edad y a biaha por lo menos 10 hora pa bishita nos One Happy Island pa un ultimo biaha. Nan ta hopi gradecido na Minister Endy Croes y su team pa e oportunidad aki.
Ocean awor ta preparando pa e próximo evento di landamento internacional cu ta Carifta 2024, cu lo tuma lugar na Bahamas den Maart otro aña, unda cu e y su colleganan di team di landamento lo bataya un biaha mas pa trese mas medaya pa Aruba.