ORANJESTAD: Dabierna ultimo, Minister di Enseñansa y Deporte Endy Croes hunto cu colega Minister Geoffrey Wever a atende a apertura di e gym Cuts and Curves na Sero Patrishi. Un proyecto grandi cu hopi lucha di un hoben determina cu a wordo cristalisa e aña aki. A inicia e ceremonia cu nos himno Aruba Dushi Tera, interpreta pa cantante Sra. Ghislaine Grant. Siguientemente, e propietario di gym Sr. Jacinto Rasmijn a duna un discurso hopi inspirativo y emocional, unda cu el a gradici su mayornan cu a yud’e yega na su metanan. Sr. Jacinto Rasmijn hunto cu Sr. Manual Da Silva a corta cinta cora como acto simbolico pa e inauguracion oficial di e facilidad nobo y ultramoderno di e gym Cuts and Curves. Despues di e ceremonia, Minister Endy Croes hunto cu e invitadonan presente a haya un recorido di e gym. Minister Endy Croes ta felicita Sr. Jacinto, Sra. Cindy, pero tambe Sr. Chinto, Sra. Maria y ful e team cu e gran logro aki.