Awor cu parlamentario Chris Dammers di AVP no tin ningun argumento mas pa defende e malgobernacion di su partido, el a dicidi e biaha aki di recori na e asunto di ideologia di nos partido haciendo como sifuera cu su ideologia cristian democrata ta superior na tur otro na Aruba y den henter mundo.
Sinembargo tin un dicho cu ta bisa cu “bo tin cu practica locual bo ta predica” y aki mester mustra Chris Dammers riba e echo cu su partido AVP ta leu di cumpli cu e ideologia cristian democrata cu nan kier halsa y propaganda riba e ideologia social democrata di MEP.
Cortamento den subsidio
Ta imposibel di kere cu un partido cristian democrata manera AVP den nan gobernacion por a masacra un grupo grandi di hendenan vulnerabel den nos comunidad ora cu nan a corta drasticamente den e subsidio pa casnan di anciano perhudicando nos grandinan, a corta den subsidio di nos hendenan special, a corta den subsidio di nos huerfanonan na Casa Cuna, a corta den subsidio na fundacionnan cu ta trata adictonan kendenan a ser laga pa nan cuenta y benta riba caya y no a construi ningun cas social ni cas pa anciano durante e ultimo 8 añanan. Alavez e maneho desastroso di AVP a conduci cu miles di hogarnan no tin awa ni coriente debi na e locura di hedging di Gabinete Eman. Tur esaki ta parti di e ideologia cristian democrata di AVP, esta di pone un gran parti di pueblo sufri?
No ta respeta minoria
Echo ta cu AVP ta un partido anti-democratico cu ta funciona a base di liderazago di un solo famia, caminda un persona manera Chris Dammers nunca lo por yega na bira lider di e partido ya cu e no tin e fam Eman. Tambe na momento cu AVP ta den gobernacion, nan ta pasa riba cadaver mes pa impone nan maldad y practica di MEP-proof, ta trapa riba tur otro partido cu cuestiona nan, ta biba cu e pensamento constante di cu “ta nos ta manda”, pues no ta respeta minoria den Parlamento. Sin duda cu e practica di persecucion politico ta na orden di dia cerca AVP. Con bo por yama un partido asina aki democratico, ora cu nan ta uza forsa bruto contra manifestantenan cu ta haci uzo di nan derecho democratico pa protesta?
Pues locual Chris Dammers a publica ultimamente ta un barbaridad completo y ta muestra di e decadencia cu ta reina den su partido ya cu nan no tin ningun argumento sano mas pa hustifica e mal maneho cu nan a hiba durante e ultimo 8 añanan.