Presidente di Venezuela, Nicolás Maduro, ta sigui dilanti cu su plan pa tuma control di Essequibo, e region rico den petroleo cu ta bou di control di Guyana, cu ta nan bisiña.
Guayana a pone su forsanan di defensa den un alerta completo como respuesta na e menasanan di Maduro.
Den un discurso riba Facebook criticando sr. Maduro su “pasonan fout”, Presidente di Guayana Irfaan Ali a bisa cu e ya a papia cu e secretario general di Naciones Unidas y ta pidi pa Conseho di Siguridad di Naciones Unidas considera un intervencion, prome cu ta laat.
“Esaki ta un menasa directo pa e integridad territorial di Guayana, su soberania y independencia politico,” e la bisa. “Guayana ta mira esaki manera un amenasa inminente… y lo intensifica medidanan preventivo pa proteha su territorio.”
Diadomingo, mas di 95% di votadornan den referendo na Venezuela a aproba establecimento di un estado nobo di Venezuela den e region. Aunque solamente dos miyon persona a vota – mas o menos 10% di votantenan eligibel – e alegacion di Venezuela riba Essequibo ta goza di amplio sosten den e pais.
E asunto awor ta bou di Corte Internacional di Husticia, aunque Venezuela ta bisa cu e corte no tin autoridad pa tuma decision riba dje. E corte a adverti Venezuela pa no tuma ningun accion cu por cambia e situacion actual na Essequibo.
Essequibo ta bou di autoridad di Guayana – y prome cu esey, di British Guayana – pa mas cu un siglo, pero Venezuela ya hopi tempo ta trata di controla esaki.
E rikesa di Guayana ta basa mayoria ariba e produccion y exportacion di petroleo, cual a hasi su economia uno di e mas rapido creciente den mundo ultimamente.