Cu hopi orguyo, Aruba Tourism Authority por mira bek na un campaña innovador y sumamente exitoso titula “E Trabou Mas Facil di Mundo”. E campaña tabata diseña pa ofrece e oportunidad unico na un bishitante pa bira e proximo pronosticador di tempo pa e isla di Aruba. A.T.A. ta hopi contento pa anuncia resultadonan excepcional di e campaña aki, cu a sobrepasa tur expectativa.
E campaña a wordo introduci na cuminsamento di 2023 cu un lansamento strategico di un comunicado di prensa na Norte America. E relato di prensa a pone enfasis riba “E Efecto di Aruba”, incluyendo nos lama blauw, beachnan impecabel y e clima fantastico cu nos ta gosa di dje. Estadistica ta mustra cu Aruba ta e destinacion den Caribe cu tin e cantidad di mas halto di dia pa aña caminda cu solo ta briya y esaki netamente tabata e inspiracion pa crea e vacatura pa “E Trabou Mas Facil di Mundo” – pasobra pa pronostica e condicionnan di tempo na un isla caminda solo ta briya casi diariamente ta un trabou realmente facil.
E comunicado di prensa a logra atrae atencion amplio di medionan di diferente publicacionnan prestigioso na Merca y Canada, entre otro Forbes, Thrillist, Travel + Leisure, Travel Pulse y Travel Noire. Adicionalmente, un partnership strategico cu e programa Daytime a contribui significantemente na e exito di e campaña.
En total, “E Trabou Mas Facil di Mundo” a resulta den 407 sindicacion di comunicado di prensa, 155 segmento, 90 cobertura den medionan di comunicacion y miyones di impresion riba rednan social cu a amplifica e campaña. E cantidad total di impression incluyendo articulonan den media, relato di prensa, segmentonan riba canalnan di television y contenido riba rednan social a surpasa 3.6 biyon impresion cu ta ekivalente na un balor di PR di mas cu $33,561.185.02 – resultando den un retorno di inversion di $335 pa cada $1 cu a wordo inverti den e campaña aki.
Pa conclui, e “Trabou Mas Facil di Mundo” no solamente a sobrepasa tur expectativa, sino tambe a crea un standard nobo pa campañanan innovador y impactante. Como parti di e strategia di mercadeo, A.T.A. lo sigui pone enfasis riba e aspecto di relacion publico (PR) caminda cu di un forma creativo ta haci uzo di nos recursonan natural pa por crea un storia atractivo cu ta yama atencion di medionan di prensa, asina alcansando posibel bishitantenan.
Como resultado di e campaña aki, mas cu 800 persona a aplica pa “E Trabou Mas Facil Di Mundo”. Despues di un proceso amplio pa repasa tur e aplicacionnan, A.T.A. a scoge e persona cu lo bira e pronosticador di tempo pa Aruba. Proximamente e ganado lo ta di bishita na Aruba pa presenta e boletin di tempo for di algun di e luganan di mas impresionante rond di nos isla.