Amplia bo conocemento y aumenta bo oportunidad
ORANJESTAD: Dialuna mainta, durante Conferencia di Prensa di Gobierno di Aruba a tuma luga ceremonia di reapertura di e facilidad nobo y moderno di Enseñansa pa Empleo. Minister Endy Croes tabata presente na e ocasion special aki. Tambe presente e mainta aki tabata Minister President Evelyn Wever – Croes, Minister Dangui Oduber, Vice Presidente di Parlamento Raymond Kamperveen y Parlamentarionan Darlaine Guedez – Erasmus, Setty Christiaans Yarzagaray, Hendrik Tevreden, Ricky Hoek y Marco Berlis. Manera ta conoci, Enseñansa pa Empleo ta un instituto cu ta ofrece curso di formacion y training pa amplia e conocemento y aumenta e oportunidad di e cursistanan. Enseñansa pa Empleo ta hunga un rol importante den desaroyo di nos economia door di brinda oportunidad na tur nos yiunan di tera y esnan resindencia na Aruba e oportunidad pa recapacita nan mes pa asina por bolbe bek den e mercado laboral. Na aña 2022 EPE a conta cu 600 cursista y den 2023 e cifra a subi te cu 1600 cursista. Sigur nos por mira un crecemento grandi y interes den e instituto aki. Pa conclui, Minister Endy Croes ta felicita Gabinete Wever – Croes II, su colega Minister Glenbert Croes y su team cu a traha duro pa “rebrand” e logo nobo di Enseñansa pa Empleo y reapertura di e facilidad aki.