Riba diabierna 10 di november, Minister Maduro di Cultura a hiba palabra den e reunion plenario di e 42 Conferencia General di UNESCO cu a tuma luga na e UNESCO Headquarters na Paris, Francia. Na e ocasion aki diferente Ministernan di Enseñansa y Cultura a brinda informacion riba con na nan respectivo Pais nan ta trahando pa asina por implementa e vision di UNESCO pa logra paz atraves di educacion, ciencia, cultura, comunicacion y informacion.
Minister Maduro a informa e plenario cu Aruba ta comprometi cu e vision di UNESCO y a brinda algun ehempel di esaki. Aruba tin ya caba 4 ‘UNESCO Schools’ na unda hobennan ta siña mas di e metanan pa un desaroyo sostenibel di nos mundo. Aruba ta cabes di e programa di Memory of the World pa e region di Caribe y Latino America yama MOWLAC cu ta percura pa e herencia cultural por keda conserva pa humanidad. Un experto Arubiano tambe lidera e programa di IOCARIBE cu traha na bienestar di e conservacion di nos oceanonan. Minister Maduro a informa tambe cu e aña aki Aruba tin un Minister y un representante den e Youth Forum di UNESCO pa asina intercambia pensamento cu otro hobennan di rond mundo y busca solucionnan duradero na bienestar di humanidad.
Minister Maduro ta gradici Secretario General di UNESCO na Aruba, sra. Marushka Tromp, y tur miembro di e Comicion Nacional di UNESCO na Aruba pa a compila y prepara tur informacion necesario pa asina esaki por a keda presenta den e reunion plenario di e 42 Conferencia General di UNESCO.