Na aña 2022 Departamento di Mucha y Hoben a start un trayectoria pa yega na un colaboracion cu Christelijke Hogeschool Windesheim. Surella Croeze, como un ex studiante cu a termina su estudio di HBO Pedagogisch Management Kinderpvang (PMK), a wak posibilidad pa ricibi guia/sosten pa e doño-nan y cabesantenan di Centro di Cuido di Mucha (kinderopvang) na Aruba.
Manera DMH ya ta informando, e Ley di Centro di Cuido di Mucha a drenta na vigor dia 15 di augustus 2023 y DMH kier sostene y brinda ayudo na e Centronan di Cuido di Mucha cu e implementacion di esaki. Surella Croeze, kende actualmente ta laborando na Departamento di Mucha y Hoben como Beleidsmedewerker, a crea e conexion necesario pa Aruba por ricibi ‘stagiaires’ di Windesheim, particularmente den e area di maneho di un Centro di Cuido di Mucha (kinderopvang).
Mester bisa, cu e bishita labora di Windesheim den e siman di 6 te cu 10 di november 2023, tabata uno hopi productivo y inspirativo. Sven Wierda (International Coordinator Health Care and Social Work Division), Miranda Semeleer (Opleidingsmanager en docent PMKE) y Willemijn van Gelderen (Rolhouder praktijkleren en docent PMKE) di Christelijke Hogeschool Windesheim a keda hopi impresiona cu e diversidad amplio cu tin den Centronan di Cuido di Mucha na Aruba, ya cu nan a haya oportunidad di bay uno den tur districto di Aruba.
E meta pa Windesheim haya un bista di Centro di Cuido di Mucha na Aruba a resulta uno hopi positivo. Awor ta inicia e siguiente pasonan pa futuro, cu ta haya studiante, cu por asisti y brinda sosten na e cabesante/propietario cu diferente aspecto di maneho, manera; crea/revisa/implementa nan plan pedagogico, forma comision di mayor, haci un encuesta di satisfaccion bou di e mayornan di e Centro, etc.
A logra bishita un Centro di Cuido di Mucha den cada districto, pero tambe a sinta cu diferente stakeholders crucial, cu ta traha cu e sector aki di Centro di Cuido di Mucha na Aruba.
E siguiente paso ta, cu e bishitantenan aki lo caba di concretisa y alabes presenta e plan na nan scol, pa asina pronto den 2024, por cuminsa ricibi algun studiante.
DMH kier gradici di curason e siguiente Centronan di Cuido di Mucha, como tambe e stakeholders cu a habri nan porta pa e profesionalnan aki y comparti e informacionnan relevante, crucial y sincero durante e bishita aki. Un danki di curason ta bay na:
Kinderdagverblijf Chinchirinchi (Noord), M-Joy Childcare Center (Sero Biento), Shami’s Creche (San Nicolas), Belle Bambino Kinderdagverblijf (Tanki Leendert), E Barco Di Noah Kinderdagverblijf (Santa Cruz), Het Kinderparadijs (Oranjestad), Poeroenchi Kinderopvang (Paradera), University of Aruba,Cas Marie, centro di encuentro pa persona cu Demencia y nan Famia, Fundacion Pa Nos Muchanan y Colegio EPI.