ORANJESTAD – Awe mainta, den sala di Corte di Husticia, Hues a bisa su decision riba e cantidad di peticionnan cu abogadonan y sospechosonan mes a haci pa scucha testigonan den caso Flamingo. E Hues di Hulanda, a bin Aruba special pa atende cu caso Flamingo.
Den sala di Corte tabata presente Otmar Oduber, su yiu Jeandrick Oduber, Eisia Esser, Richinella Wever Croes y Laurence Phillips.
RECHAZA PETICION PA POSPONE CASO
Ta asina cu abogado mr. Carlo y abogado mr. D.Croes, dialuna a bisa Hues cu nan no a haya suficiente tempo pa studia tur e documentonan. Nan a pidi pa pospone e “regie zitting” y bin cu un di dos “regie zitting” pa asina nan por tin un mihor bista kendenan tur nan kier pa wordo interoga door di Hues Comisario. Asina mes e abogadonan a menciona un cantidad di personanan cu nan kier pa wordo interoga.
Hues a cuminsa cu Otmar Oduber y a mustra cu Otmar a wordo interoga 10 biaha y abogado mester ta na altura di tur informacionnan. Hues a rechaza e peticion pa pospone e caso. Pa loke ta e peticion pa interoga un cantidad di testigonan, Hues ta haya cu ta na beneficio di e defensa pa scucha testigonan. El a aproba pa scucha 30 testigo cu ta encera entre otro funcionarionan di DIP y algun agente di e team investigador. Tambe den e testigonan tin algun di e sospechosonan di caso Flamingo.
APROBA PETICION PA SCUHCA MARISOL TROMP
Pa cu e peticion pa scucha e agentenan di investigacion, Hues a rechaza esaki. Pero Hues a aproba e peticion pa interoga Marisol Tromp. E otro testigonan lo wordo rechaza. Hues ta haya cu esaki no ta perhudica Otmar den su defensa.
Hues a aproba e peticion di Esser y Phillip pa scucha Marisol Tromp.
RECHAZA PA SCUCHA PROMER MINISTER
Den e asunto di “spook ambtenaar”, Hues a rechaza e peticion pa scucha e mandatarionan Wever Croes, Croes y Oduber. Hues a mustra cu segun Otmar, tin palabracion politico. Pero segun declaracion di Hans Geerman, e no tabata traha pa Minister Presidente sino Otmar Oduber. Hues a rechaza tambe e peticion di Esser y Phillip pa scucha Promer Minister Wever Croes.
APROBA PA SCUCHA TESTIGONAN
Hues a sigui bisa cu e ta aproba pa scucha 9 testigo di e peticionnan cu mr. D.Croes a haci.
Hues a rechaza e peticion di mr. Odor pa laga psycologo y psychiater evalua e estado mental di Wever Croes durante e periodo cu e ta wordo acusa. Hues a bisa cu e lo ordena pa Reclasering traha un raport. Hues a aproba 5 testigo, di e peticionnan di mr. Odor pa wordo interoga na Hues Comisario.
Hues a aproba e peticion di Jeandrick Oduber, pa scucha 3 testigo.
Hues a aproba e peticion di Phillips, pa scucha Marisol Tromp pero a rechaza e peticion pa scucha Promer Minister.
CASO POSPONI PA TEMPO INDIFINI
Promer cu a caba cu su decision, Hues a bisa cu e por imagina cu despues di scucha testigonan, abogado(nan) lo kier sucha mas testigo. Hues a bisa cu e abogadonan lo por pidi Hues Comisario y Hues Comisario lo consulta cu Hues. Hues lo evalua si ta haci mas interogacion of no.
Hues a pospone e caso pa tempo indifini pa asina duna Hues Comisario tur tempo pa scucha e testigonan y laga Reclasering traha e raport.
|
ReplyForward
|