ORANJESTAD – Awe mainta Hues di Corte di Husticia a dicta sentencia den e caso penal cu Ministerio Publico a cuminsa contra e homber K.W. (38). Hues ta hay’e culpabel di a exporta 175,5 kilo di cocaina y a confirma e exigencia di Fiscal.
ARUBA NATIVE por a compronde cu Hues a rechaza e defensa di abogado di K.W. y a haya K.W. culpabel pa exporta 175,5 kilo di cocaina pa Hulanda.
FISCAL
Dia 6 October 2023, tratamento di e caso a tuma lugar caminda Fiscal a bisa Hues cu dia 6 Juni 2023, cacho anti droga a reacciona riba 46 saco di hariña cu tabata den un container na Fast Delivery destina pa Hulanda. A resulta cu tabatin 175,5 kilo di cocaina scondi den e sacaonan aki. K.W. tabata esun cu a cumpra e saconan di hariña y a hiba esakinan na Fast Delivery. Fiscal a mustra cu 5 Juni 2023, K.W. a hiba e saconan den un truck na Fast Delivery. Dia 3 Juni 2023, K.W. a cumpra e saconan di hariña. Na opinion di Fiscal, e saconan di hariña a wordo habri y cosi di nobo. Na Mei 2023, K.W. a haya un machine di cose di exterior. Fiscal ta haya cu K.W. tabata sa di e transporte di droga. Fiscal a bisa cu e no ta kere cu K.W. no tabata sa cu tin droga den e saconan scondi. Fiscal a bisa cu no ta logico cu ta busca hariña for di Aruba cu ta bin for di Belgica y despues mand’e Hulanda. El a exigi 4 aña di prison pa K.W.
SENTENCIA
Hues a bisa cu e defensa di abogado ta wordo rechaza. E ponencia cu K.W. no tabata sa cu e saconan tabata contene droga, y tambe cu tin duda con a yega na e cantidad di cocaina ta wordo rechaza. Hues ta haya K.W. culpable. Pa cu e castigo, Hues a tene cuenta cu 175,5 kilo di cocaina kier a exporta. Hues tambe a tene cuenta cu K.W. ta keda desmenti y no a tuma responsabilidad. Hues ta haya e exigencia di Fiscal na su lugar y a condena K.W. na 4 aña di prison.