Mayoria di esnan cu a cuminsa e curso, a caba tambe cu hopi entusiasmo y empodera
Pa e ultimo 3 simannan, na Cede di MEP a tuma luga un curso di liderazgo cu a wordo organisa pa Fundacion Formation Politico Nelson Oduber (FFPNO) bou guia di candidato di MEP Michella Steenvoorde-Lacle. Participantenan a inicia un biahe cu a inspira y empodera nan. Cu un comienso yen di entusiasmo, e curso a conta cu un atendencia grandi y e compromiso firme di participantenan pa crece den a area di liderazgo. E mayoria cu a cuminsa e curso, a caba e curso y na final a haya un test y un certificado di participacion.
E curso a wordo duna pa señora Paula Giraldo, cu a traves di e enseñansanan di John Maxwell, y e energia y sabidura cu el a pone durante cada session añadiendo un contenido propio y hopi interesante, a captura interes di cada participante, asegurando tambe asina cu e mayoria di esnan cu a cuminsa e curso, a caba tambe cu hopi entusiasmo y empodera.
Señora Paula ta un Oradora, Coach pa Liderazgo Personal, Facilitador, Propietario di negoshi, Caleb’s Goal Potential & Purpose. Paula ta facilita curso y entrenamento pa compania, grupo y organisacionnan pa mehora liderazgo, ambiente di trabou, motivacion, planificacion di meta, benta, maneho di negoshi y habilidadnan den comunicacion, entre otro. Banda di esaki, Paula ta duna conseho y asistencia na empresarionan entre otro: desaroya plan di negoshi basico y identifica forsa y debilidad di negoshi.
Na final di e curso, Secretario General di Partido MEP, Endy Croes a felicita tur participante pa nan tempo pa cuminsa y completa e curso aki. Como Minister di Enseñansa, e Secretario General di Partido a remarca cu e meta di Gabinete Wever-Croes ta pa encurasha e Life Long Learning cu ta bin di e Metanan di Desaroyo Sustenibel number 4 (SDG’s). Y Partido MEP ta contribui na e meta aki organisando cursonan y duna oportunidad na ciudadanonan di hoben bay ariba pa sigui engrandece nan conocemento den diferente area. Na final, Endy Croes y señora Paula a entrega certificado na tur cu a participa.
Partido MEP y Fundacion Formation Politico Nelson Oduber ta gradici señora Paula pa a duna 3 siman di su tempo pa duna e curso interesante aki. Na final, tambe, Junior Arends, den nomber di cada participante, a gradici Paula y a entreg’e un regalito di aprecio. Un danki tambe na señora Michella Steenvoorde-Lacle cu ta e motor tras di e programanan di FFPNO.
E anochi a termina cu un dushi ambiente na unda cu partidipantenan a mustra nan talento cu declamacion di poesia y cantamento (karaoke). Partido MEP ta encurasha comunidad di Aruba pa keda pendiente y participa na e siguiente curso y of tayer cu lo tuma luga nos Cede.