Philipsburg – Ta premira cu Sint Maarten ta realisa surplus riba servicio ordinario (gewone dienst) na 2023. Te cu awo, e inversionnan conforme e presupuesto aproba pa 2023 ta kedando atras. Colegio di supervision financiero Corsou y Sint Maarten (Cft) ta preocupa basta tempo caba pa trata e presupuestonan na tempo. Cft a pidi Sint Maarten pa duna prioridad na aprobacion di presupuesto di 2024 y presenta e presupuesto cu planificacion plurianual di inversion.
Te dia di awe, Sint Maarten no a logra aproba un presupuesto na tempo. Tampoco no a aproba e modificacion di presupuesto 2023 ainda. Cft ta enfatisa cu ta importante pa dispone di suficiente capacidad pa esaki. Ultimo añanan, Sint Maarten no a logra di hiba e invershonnan (excluyendo inversion di fondo fiduciario) na un nivel mas halto. Den presupuesto aproba pa 2023, Sint Maarten a inclui un suma di ANG 90 miyon na inversion. Pa mayor parti di suma aki (ANG 61 miyon), Sint Maarten ta haciendo un prestamo. Cft a conseha Sint Maarten pa cuminsa ehecuta e inversionnan planea mas pronto posibel.
ENNIA y refinanciamento di e ayudo di likides
Hulanda a mara e refinanciamento di e fiansa pa ayudo di likides na un solucion duradero pa e caso ENNIA. E solucion cu Sint Maarten y Corsou a scohe recientemente pa un likidacion controla, Cft ta considera menos riscante cu un relansamento di ENNIA. Basa riba e solucion aki, Sint Maarten y Hulanda a acorda un refinanciamento di e prestamo pa ayudo di likides na un interes di 3,4 porciento.
Belasting
Cft a trata e retraso di reforma fiscal y modernisacion di e Departamento di Impuesto cu minister di Finansa. Eseynan ta necesario pa aumenta entrada di belasting. Sint Maarten ta trahando riba reforma di impuesto di alohamento riba huur di cas na turista y introduccion di un impuesto pa turista na yegada. Cft ta considera esey un desaroyo positivo, pero ta keda enfatisa riba necesidad di revision mas amplio di e sistema fiscal.
Fondo di cuido y fondo social
Sint Maarten ta trahando riba reforma pa reduci deficit creciente di fondo di cuido. Cu introduccion di un seguro general pa gasto medico, Sint Maarten ta spera di dal un paso importante pa esaki. Cft a expresa su preocupacion pa implementa esaki na tempo. Un retraso por hiba na gasto adicional pa e pais. Ademas, e pais tin debe na Organo Ehecutivo di Seguro Social y Seguro Medico (SZV). Si Gobierno cancela su debe, esey lo hiba na mehoracion di posicion financiero di SZV.