Dutch Caribbean Nature Alliance (DCNA) ta kontentu di por anunsiá lansamentu di e di tres edishon tan sperá di Bionews Kids, un revista dinámiko di naturalesa diseñá pa mucha di 10 pa 12 aña na e seis islanan di Karibe Hulandes. E publikashon fasinante akí, optenibel tantu den forma di ‘hardcopy’ komo online, ta un piedra di skina di e dedikashon di DCNA na tesoramentu di amor pa naturalesa i fortifikashon di edukashon di naturalesa serka hóbennan di Karibe Hulandes!
BioNews Kids: fomentando kuriosidat i konservashon
A krea BioNews Kids ku un mishon bon kla: inspirá mentenan hóben pa eksplorá e maravianan di naturalesa i kultivá un sentido di responsabilidat pa konservashon di esakinan. E revista grátis akí, desaroyá den kolaborashon ku organisashonnan di parke i di protekshon di naturalesa na Aruba, Boneiru, Kòrsou, Saba, Sint Eustatius i Sint Maarten, ta sirbi komo un instrumento esensial ku ta ekipá nos muchanan ku konosementu tokante e ekosistemanan úniko di e islanan di Karibe Hulandes i e desafionan ku nan ta konfrontá. E edishon di e aña akí ta enfoká riba diferente tópiko, manera komunikashon ku bestia, determiná kua bestia ta mas rápido i asta kambio di klima.
Kontenido enrikesedor pa mentenan ku tin gana di siña
E di tres edishon di BioNews Kids ta brinda un variedat amplio na kontenido, entre otro wega interaktivo, obra di man kreativo i un kompetensia di pintamentu. E lesadónan ta bai hasi un biahe koutivante huntu ku personahenan kerí, manera Tara e Turtuga i Pepe e Polip di Koral, ku ta aktua komo guianan konfiabel i ku ta hiba e muchanan atraves di e diferente sekshonnan di e revista. Núkleo di BioNews Kids ta e fe profundo den e forsa pa konektá hende hóben ku nan ambiente natural. Pa medio di ofresé un plataforma kaminda nos muchanan por siña, deskubrí i interkambiá ku medio ambiente, DCNA ke brinda nan un apresio permanente pa e bunitesa i vulnerabilidat di nos planeta.
Big Live Nature Quiz: un plataforma pa siña i pasa prèt
E aña akí BioNews Kids ta konektá perfektamente ku e Big Live Nature Quiz di DCNA – un evento vibrante i edukativo hinká den otro pa alumnonan di 10 pa 12 aña. A diseñá e kues pa pone énfasis riba tópikonan spesífiko di edukashon di naturalesa i e ta ofresé un oportunidat úniko pa mentenan hóben pa demostrá e konosementu ku nan a atkirí pa medio di lesa BioNews Kids. E kues ta pa alumnonan di grupo 7 i 8 (klas 5 i 6) i e ta primintí di bira un eksperensia fasinante i enrikesedor, ku ta tuma lugá durante orario regular di skol. Ban partisipá na e evento dia 2 di novèmber 2023!
Via programanan manera BioNews Kids i Big Live Nature Quiz, DCNA ta forma un generashon di lidernan konsiente di medio ambiente. E inisiativanan akí no solamente ta duna informashon krusial tokante ekosistemanan úniko di e islanan di Karibe Hulandes, pero ta fomentá tambe un sentido di responsabilidat pa konservashon di esakinan. Pa medio di promové un konekshon berdadero ku naturalesa for di edat hóben kaba, e organisashonnan di parke i protekshon di naturalesa ta sembra e simianan pa un futuro sostenibel, kaminda e individuonan hóben akí lo hunga un ròl krusial den protekshon di e biodiversidat balioso di nos planeta.
Uni ku nos den e esfuerso eksitante akí! Kordialmente DCNA ta enkurashá studiantenan di tur e seis islanan di Karibe Hulandes pa partisipá na e Big Live Nature Quiz i pa bai riba un biahe di eksplorashon via e páginanan di BioNews Kids.
Lesa BioNews Kids
BioNews Kids ta risibí sosten generoso di Ministerio di Agrikultura, Naturalesa i Kalidat di Kuminda i Nationale Postcode Loterij i e ta un kreashon di DCNA.
Wak e revistanan akinan:
BioNews Kids Online:
- NL: https://issuu.com/tinekevanbussel/docs/bionewskids-issue3-nederlands_flipbook
- ENG: https://issuu.com/projects.assistant.dcna/docs/bionewskids-issue3-engels_flipbook
PapTO: https://issuu.com/projects.assistant.dcna/docs/bionewskids-issue3-papto_flipbook - PapTU: https://issuu.com/projects.assistant.dcna/docs/bionewskids-issue3-paptu_flipbook
BioNews Kids Hardcopy: tuma kontakto ku e funshonario di edukashon di bo organisashon lokal di parke i protekshon di naturalesa na bo isla (https://dcnanature.org/nature-education/).
BioNews (pa adulto) – notisiero digital mensual grátis: https://dcnanature.org/news/
Bo ke partisipá ‘Big Libe Nature Quiz’?
Partisipashon ta grátis, pero registrashon ta obligatorio. Dosentenan por registrá nan klas/grupo online: www.BigLiveNatureQuiz.org
****************************************************************************
Potrèt map: Photos BioNews Kids 3
Potrèt 1: E di tres edishon di e portada di Bionews Kids. Diseño gráfiko: Deviate Design, Bonaire.
Potrèt 2 i 3: Foto credit Carmabi- Curacao- alle rechten voorbehouden
Pa pregunta òf entrevista bo por tuma kontakto ku [email protected]
****************************************************************************