ORANJESTAD – Riba un mision oficial fin di september ultimo, Paul Hector kende ta coordina e programa di C&I di UNESCO, a bishita Comision Nacional di UNESCO-Aruba. Sr. Hector a topa cu sra. Xiomara Maduro, Minister di Finansa y Cultura, kende alabes ta presidente di UNESCO-Aruba. Otro minister cu a combersa cune tabata sr. Geoffrey Wever, kende ta encarga cu Asuntonan Economico, Comunicacion y Desaroyo Sostenibel. E reunionnan a duna oportunidad pa discuti riba eventual cooperacion entre UNESCO-Kingston y e diferente instancianan na Aruba cu ta traha riba tereno di comunicacion y informacion. Den futuro por explora e areanan pa extende y reforsa e infrastuctura di Aruba riba nivel academico, sociedad civil, media, tecnologia digital y di hubentud.
E bishita di Sr. Hector na Aruba a coincidi cu Dia Internacional di UNESCO pa Acceso Universal na Informacion. Di e forma aki sr. Hector por a participa na algun celebracion organisa na Aruba. International Day for Universal Access to Information (IDUAI) di UNESCO, ta tuma luga anualmente riba 28 di september.
E dia aki ta yuda contribui na conscientisacion di e importancia di acceso na informacion como un derecho humano fundamental. E celebracion ta crucial pa empodera esnan cu ta traha riba nivel di comunicacion y informacion y pa logra un desaroyo duradero di un pais.
Sr. Hector a participa como orador durante e lansamento di e website http://coleccion.aw
‘Coleccion Aruba’ ta un archivo digital cu ta contene mas di 80,000 records crea y administra pa Biblioteca Nacional di Aruba den colaboracion cu varios partners institucional na Aruba.
Preparacion pa e Siman di Media y Alfabetisacion di Informacion Global cu UNESCO ta celebra di 24 te cu 31 di october cada aña, tabata otro punto importante riba agenda di Sr. Hector. Durante e siman di Global Media and Information Literacy (MIL) Week 2023, UNESCO-Aruba y partnernan a pone atencion na algun actividad nacional. MIL-Week ta pa conscientisa publico riba e habilidad y uzo responsabel di informacion y media. Esaki ta inclui pensamento critico, alfabetisacion digital y conocemento etico ora di evalua y crea acceso na informacion.
Durante su bishita, Sr. Hector tabata acompaña pa miembronan di UNESCO-Aruba, incluyendo sra. Marushka Tromp, Secretario Generaal, sra. Birgit Kreykenbohm, Specialista di Programma pa Comunicacion y Informacion, y sr. Peter Scholing, miembro y Presidente di Comite di Memoria di Mundo di UNESCO y Latinoamerica y Caribe (MoWLAC).
Pa informacion adicional tocante e topiconan menciona den e articulo aki, por bishita e siguiente recursonan online:
· UNESCO Regional Office for the Caribbean – https://www.unesco.org/en/fieldoffice/kingston
International Day for Universal Access to Information – https://www.unesco.org/en/days/universal-access-information · Media and Information Literacy – https://www.unesco.org/en/media-information-literacy
Colleccion Aruba – http://coleccion.aw