Den conferencia di prensa riba diamars 10 october 2023, Minister President di Aruba a informa Pueblo di Aruba tocante e prome acuerdo firma pa e fianza di COVID for di Hulanda na un porcentahe di 6.9%. Pa medio di un comunicado di prensa, ATIA ta indica cu e fianza aki lo costa Aruba Afl. 109 miyon florin na aña 2024 y a expresa algun preocupacion. E analisis di ATIA ta parcialmente corecto, pero e informacion presenta no ta completo. Pa evita cu e dianan nos dilanti un debate publico wordo hiba den cual ta falta informacion, Minister Maduro di Finansa ta trece e informacion corecto pa locual ta trata e gastonan cu e fiansa di COVID cera cu Hulanda ta trece cune pa Pueblo di Aruba.
Aki ta sigui algun informacion cu ATIA a keda falta pa informa comunidad corectamente. Ta informacion cu facilmente por a wordo saca for di ATIA su propio analisis:
• Ta corecto cu e prome pago riba e debe di COVID lo ta AFL 109 miyon florin, pero di esaki AFL 46 miyon florin no ta un costo. Esaki ta un pago pa baha e debe y esey no ta un costo. E costo a wordo haci durante COVID na momento cu presta placa pa yuda, entre otro, e miembronan di e propio ATIA pa nan por a sobrevivi e pandemia. Ta na e momento eynan a haci e costo. Gobierno a paga e costo ey pa medio di un fiansa y awe Hulanda ta exigi pa nos cuminsa paga e fiansa ey bek.
• Den e prome pago tin un costo di interes di AFL 63 miyon florin. Den e sistema linear cu Aruba a scohe, e costo aki lo ta baha anualmente y den un periodo di 20 aña esaki lo resulta na un total di interes cu ta AFL 137 miyon menos compara cu e sistema di annuiteit cu Hulanda a exigi. Cu Aruba lo paga 21% menos na interes ta den e calculo cu ATIA a haci, pero lamentablemente ATIA a scohe pa no menciona e informacion importante aki.
• Pa haci un presentacion completo ATIA por a menciona cu no ta tur aña Aruba lo mester paga e AFL 109 miyon na Hulanda, pasobra den e sistema linear cu Aruba a scohe, e costo di interes ta baha mas rapido.
• ATIA a falta pa splica cu e acuerdo entre Aruba y Hulanda di dia 10 di october ultimo, no ta e acuerdo definitivo y cu e interes di 6.9% tampoco ta e interes definitivo.
• Ademas, den caso cu Hulanda nenga di baha e interes, Aruba a logra inclui den e contract un clausula cu ta permiti nos paga bek na cualkier momento. Esey ta duna Aruba tur espacio durante 20 aña pa sali for di e acuerdo aki.
• Pakico a firma anto? ATIA conoce e contesta riba esey tambe. E fecha 10 di oktober 2023 tabata e ultimo dia pa firma pa por a evita un ‘default,’ y 6.9% ta e unico interes cu tabata disponibel riba e fecha eynan. No tabata tin interes di 3.1%, ni 5.1% disponibel riba e fecha ey, pa e motibo eynan locual ATIA ta propone ta un ‘false-choice’.
• Pa un presentacion balansa lo tabata bon pa ATIA splica kico ta e condicionnan cu Hulanda a pone, pa Aruba un dia por cualifica pa yega na un interes mas abou. Ta bon pa nos tende si ATIA ta kere cu Aruba lo por a cumpli cu tur condicion prome cu e fecha di 10 di oktober 2023.
• Por ehempel, ta bon pa ATIA splica pakico den nan opinion ta bon idea pa Aruba entrega y cancela su derecho pa den futuro por regla un ‘kwijtschelding’ di e debe di COVID, pasobra esaki ta netamente un di e condicionnan cu Hulanda a pone pa Aruba por haya un interes mas abou.
• Den e analisis di ATIA a keda falta tambe un estudio di e scenario na unda Aruba ta keda sin firma. Compara e acuerdo cu tin awo cu e impacto di un ‘default’ den caso cu Aruba no a firma. Lo ta bon pa ATIA comparti cu comercio en particular y Pueblo en general e costo di un ‘default’ asina pa tur comerciante, inversionista y habitante di Aruba. Si ATIA su intencion ta pa informa comunidad debidamenta, anto e ora ATIA mester duna informacion completo y duna su opinion tambe riba kico lo ta e costo si Aruba lo a keda sin yega na un acuerdo cu Hulanda, y bay den un situacion di ‘default.’
Mas cu claro, e no ta na beneficio di Aruba pa causa angustia y malcontento door di comparti informacion incompleto di un negosacion cu ainda no ta cla. E team di Aruba ta sigui haci esfuerzo pa yega na un interes mas abou, pero cu condicionnan husto pa e Pueblo di Aruba. ATIA como gremio comercial y ‘stakeholder’ lo ricibi tur informacion na momento cu esaki ta cla pa wordo comparti y cu nan haya un invitacion pa un reunion manera a wordo bisa.
FIN