Riba 18 october 2023, Dia Nacional contra Traficacion di Hende, CMMA hunto cu Minister President di Aruba, Sra. Evelyna C. Wever-Croes, y Minister di Husticia y Asuntonan Social, Sr. Rocco Tjon, a introduci un produccion local nobo “Otro Banda di e Cam” durante un VIP première na GLORIA Cinemas. E evento a ser atendi pa varios minister, miembronan di parlamento, representantenan di departementonan di gobierno, NGO’s, International Organizations y demas stakeholders y partners.
“Otro Banda di e Cam” ta forma parti di e campaña di concientisacion ‘Habri bo Wowo’. E ta un pelicula di 15 minuut unda ta sigui cu e storia di Camila, un personahe cu a haya su mes den un situacion di contrabanda di hende y traficacion di hende den forma di exploitacion laboral den e pelicula “Otro Banda di Lama” (2021). Den ‘Otro Banda di e Cam’ Camila ta bira victima di traficacion di hende den forma di exploitacion sexual via sexcams. E pelicula ta ilustra un forma moderno di traficacion di hende, unda cu un traficador ta manipula, gaña, y forsa un persona pa haci actonan sexual dilanti camara.
Den juni 2021, Coördinatiecentrum Mensenhandel Mensensmokkel Aruba (CMMA) a lansa e campaña nacional ‘Habri bo wowo’. E meta di e campaña ta pa concientiza e pueblo di Aruba tocante e problematica di traficacion di hende, un crimen cu ta tuma lugar na Aruba tambe. E campaña ta inclui informacion general via e websites www.habribowowo.com y www.cmmaruba.com y via social media (Facebook, Instagram), un pakete educacional pa scolnan secundario y informacion tocante seguridad online via e programa ‘No cai den trampa’.
Pa mas informacion subi ‘habribowowo.com’ of ‘cmmaruba.com’ of contact CMMA via email: [email protected]