ORANJESTAD – Durante un conferencia di prensa di Gobierno, Prome Minister Evelyn Wever-Croes a elabora riba su biahe na Nacionnan Uni (UN) siman pasa na unda el a atende varios reunion y conferencia. Un di e conferencianan cu tambe tawata hopi interesante tabata esun di “Finance for Developments”, cu a enfoca riba e manera con pa yega na fondo pa e “Small Islands Development States (SIDS)”, pa asina nan por cumpli cu e plannan cu nan tin.
Prome Minister tawata orador na e conferencia aki, na unda el a elabora riba e situacion di Aruba. El a splica cu pa pais Aruba, cu ta parti di Reino Hulandes, ta hopi dificil pa haya fondo di UN. Reino Hulandes ta haci donacion na UN, y p’esey ta wak Aruba como parti di Reino, como pais rico, y pa e motibo ey ta concentra mas riba e otronan paisnan cu tambe mester fondonan.
“E reunion a bay sumamente positivo, na unda cu Aruba a haya hopi elogio riba tereno di energia, pa tin un plan realistico na unda tur hende ta alinea. Nos ta riba e bon caminda, pero pa por cumpli cu tur e plannan, Aruba lo mester di fondo y nos ta keda positivo”, Prome Minister a expresa.