Horacio Oduber Hospital como un di e organisacionnan di mas grandi riba nos isla di no menos di 1100 empleado tin como enfoke pa cuida pashent y cliente, pero tambe cuida nos empleadonan y medio ambiente. Tambe teniendo na cuenta cu un di e fundacionnan di HOH ta pa ta financieramente sostenibel, recientemente a firma un MOU (Memorandum of Understanding) cu e compania local B-Energy pa ofrece panel solar como beneficio na nos empleadonan. Un momento sumamente grandi unda finalmente a introduci e programa pa empleado yama HOH SUN SHARES.
Algun luna pasa a saca un encuesta interno pa midi e interes bou di empleadonan den loke ta adkiri panel solar pa nan cas. Debi na e tremendo reaccionan ricibi, team di maneho a cuminsa negosha cu diferente companianan local cu ta ofrece panelnan solar. Y finalmente a scohe e compania cu a bin cu e miho oferta pa HOH y su empleadonan cu a resulta den e compania local B-Energy.
Un momento sumamente importante y alabes grandi mirando cu e ta posiciona HOH como un dunado di trabou cu ta ehempel pa hopi eyfo mirando cu banda di ofrece un beneficio na un miho prijs y interes abou HOH ta cuida medio ambiente tambe. Recientemente Hunta di Directiva di HOH a soprende e team completo di HOH cu e tremendo noticia aki cual tin hopi tempo ta traha riba dje pa hasi’e un realidad.
Awo tur colega na HOH cu ta interesa di tin nan propio panelnan solar na cas lo por haya esaki danki na nan dunado di trabou na un miho prijs y cu interes mas abou cu e programa interno HOH SUN SHARES. E fuente di energia renobabel aki lo spaar coleganan energia, reduci cuenta di electricidad, e ta bon pa medio ambiente y ta aumenta e balor di e cas.
Awo cu HOH a firma e acuerdo aki cu e compania local B-Energy lo start cu sesionnan di informacion den luna di oktober pa asina presenta kico e programa aki ta encera pa tur empleadonan.
Hunta di Directiva di Hospital hunto cu team di maneho ta sumamente orguyoso di e paso aki cu a tuma pa añadi mas beneficio pa nos empleadonan haciendo HOH un compania profesional cu ta cuida pashent y cliente, pero tambe ta cuida nos empleadonan y medio ambiente.