ORANJESTAD – Relaciona cu e implementacion di e sistema di cobransa di BBO na frontera cu a drenta na vigor dia 1 di augustus ultimo, Departamento di Impuesto a haci algun adaptacion den e declaracion di BBO, BAVP y BAZV conforme e cambionan di ley. E declaracion estilo nobo di BBO di e luna di augustus 2023 ta disponibel den e portal “BO impuesto” (BOi) entrante 4 di september 2023. E ultimo dia pa entrega e declaracion aki ta 15 di september 2023.
Pa yuda e comerciantenan mas tanto posibel cu e yenamento di e declaracion di BBO y contestacion di e preguntanan, Departamento di Impuesto a activa e “Helpdesk BBO na frontera”.
Comerciantenan por yama 522 7438 entre 8 or di mainta y 5 or di atardi of manda un e-mail na [email protected].
Den e dianan venidero, Departamento di Impuesto ta bay publica tambe un video di instruccion pa yuda e comerciantenan den forma visual pa yena e declaracion estilo nobo di BBO.
Departamento di Impuesto ta conseha e comerciantenan pa consulta e pagina web tambe: BBO na frontera | Departamento di Impuesto
Ta recomendabel tambe pa sigui e noticianan oficial riba impuesto.aw y e pagina di Facebook di Departmento di Impuesto.