Papilon – Diasabra anochi laat ya yegando mey anochi polis a bay un adres na Papilon, unda cu un persona lo a wordo atraca.
Mucho informacion no tin di exactamente con e atraco aki a tuma luga y/of e sitio.
Na nos yegada unda cu supuestamente e atraco a tuma luga tawata tin un auto blauw staciona, e auto posiblemente ta di e victima.
Informacion oficial di parti autoridad ta bisa cu, un hende homber lo mester a bay topa un dama den e Papilon. Pakiko no ta conoci.
Aki ta unda cu e homber a wordo sorprendi door di seis hoben, unda cu nan ta atrak’e. E grupo aki tawata tin cuchiu den nan poder y a usa esaki pa menasa e victima y kita su cellular y tambe a bay of a trata di bay cu e bateria di su auto.
E homber den susto a core bay un cas eybanda pa bati alarma.
Agentenan cu a yega prome a pidi pa notifica e departamentonan concerni manera Atraco Team y tambe e team di Tecnico pa compila mas vingerafdruk posibel.
Na final di investigacion e team a laga confisca e vehiculo pa mas investigacion.
