ORANJESTAD – Aruba: Directie Volksgezondheid (DVG) a cuminsa cu’n campaña contra e sangura Aedes Aegypti cu ta transmiti Zika, Dengue y Chikungunya. E campaña aki ta pa conscientisa hendenan muhe na estado pa proteha nan embaraso contra Zika. E virus di Zika por wordo transmiti via e placenta pa e baby den bariga, y por ocasiona efecto grave riba desaroyo di e celebro di e baby, esta microcefalia. Transmision di e virus por tuma luga via di un picadura di sangura infecta cu e virus pero tambe via contacto sexual, pasobra e virus por keda 6 luna presente den semen di hende homber. A la bes tin cu tene cuenta cu si e pareha kier sali na estado of ta na estado caba pa busca informacion cerca nan dokter di cas, ginecologo of partera. Por lo tanto DVG ta conseha tur hende muhe na estado pa nan pareha haci uzo di condom pa proteha nan mes contra e virus di Zika.
Consehero medico di DVG, Dr. Maritza Ordoñez a indica cu microcefalia, tin su efecto negativo riba un famia. Microcefalia ta un enfermedad unda cabes di e baby ta mas chikito cu normal y esaki ta pa motibo di un retraso den desaroyo di e celebro di e baby. E retraso aki por tuma luga durante embaraso, pero tambe despues cu e baby a nace.
Algun complicacion cu’n baby cu nace cu microcefalia por haya ta:
- Epilepsia;
- Retraso den desaroyo, por ehempel problema pa papia;
- Menos capacidad pa siña y funciona;
- Problema cu movecion y ekilibrio;
- Problema pa come, entre otro dificultad pa guli;
- Perdida di oido;
- Problema di bista.
Pa e motibonan aki cu DVG ta conseha hendenan muhe na estado pa tuma precausionnan necesario pa asina evita di haya e virus di Zika. Problema di e virus di Zika ta cu di cada 5 hende infecta 4 no ta presenta ningun sintoma. Esaki ta nifica cu’n persona por tin Zika y no sa mes. Tambe pa hende muhe uza repelente contra sangura pa evita di wordo pica door di sangura cu ta transmiti e virus di Zika durante nan embaraso. Semper bisti paña cu tin pia y manga largo y evita di bay unda cu tin presencia di sangura.
Pa mas informacion tuma contact cu Departamento di Salud Publico na telefon 522-4200 of via nos pagina di Facebook.