Marawiel – Diadomingo anochi rond di 10’or unidad di Brandweer a sali cu urgencia direccion Marawiel, unda cu lo tawata tin un cas na candela.
Na yegada e unidad di Brandweer mester a orienta su mes un poco y den algun minuut a yega e direccion.
Ey nan a bin topa cu un compleho di apartamento, y mesora a wordo informa door di un bisiña unda nan mester ta.
A resulta cu e bisiñanan atento na e apartamento na banda a mira huma saliendo for di e apartamento number D, y mesora a yama 911 pa avisa cu tin candela y tin un dama paden.
Bomberonan den algun seconde a “basha” e porta abou y ta haya un apartamento yen di huma. Mesora a cuminsa busca e persona paden y a habri tur bentana pa ventilacion.
Den e apartamento bomberonan lo a bin haya un dama na soño.
Pues por bisa cu actuacion rapido di bomberonan cu a yega na e sitio lihe a salba bida di e dama cu tawata drumi, momento cu su apartamento a yena cu huma.
Informacion no oficial ta bisa cu posiblemente algo lo a keda cendi den cushina, cu por a kima no solamente su apartamento pero tur e otronan tambe.
Polis cu tawata na e sitio a papia cu e dama, cu tawata mustra un poco turdi y despues a pidi pa un ambulance pa e sitio pa laga Paramediconan controla e dama.
E parti fastioso ta cu e porta a wordo kibra y mirando cu ta anochi laat, esaki lo bay keda habri.
