Kralendijk – Durante un reunion èkstra di Konseho Insular riba djamars 11 di yüli e miembronan di Konseho Insular a trata i aprobá e kuenta anual di Entidat Públiko Boneiru. E frakshonnan di UPB i MPB a vota na fabor, miéntras ku frakshon di Demokrat a vota kontra.
Den e mesun reunion e miembronan di Konseho Insular ku énfasis a supliká Kolegio Ehekutivo pa di awor en adelante kompartí informashon na tempu ku Konseho Insular, o sea publiká esakinan riba wèpsait di Entidat Públiko Boneiru. Te ku awe esaki no a kana kompletamente manera mester ta, loke ta sòru pa inkumbiniensia innesesario.
Organo mas haltu di gobernashon
Ta trata di prinsipalmente dokumentunan ku ta nesesario pa preparashon di e diferente reunionnan i/òf pa e desishonnan ku Kolegio Ehekutivo a tuma. Konseho Insular ta e órgano mas haltu di gobernashon na Boneiru i ta konsistí di representantenan di pueblo elegí di nos isla i tin komo tarea primario pa kontrolá Kolegio Ehekutivo ku ta konsistí di gezaghèber i e tres diputadonan.
Risibí informashon na tempu ta di importansia esensial pa por kumpli ku e tarea akí i por sierto ta un di e kriterionan di mas importante di bon gobernashon. Dentro di poko na nivel haltu di gobernashon kòmbersashonnan lo tuma lugá pa konhuntamente trese solushonnan padilanti pa di e manera akí mehorá e komunikashon mutuo i e fluho di informashon di Kolegio Ehekutivo pa Konseho Insular.