Como fundamento di bon gobernacion
POR E Forsa Nobo a mustra na diferente ocasion di ta innovador. Un lista forma cu personanan cu experiencia amplio den politica y alabes pa mas cu 80% candidato e lista ta consisti di personanan nobo den politica. Personanan experiencia den diferente ramo y cu vision pa sirbi pueblo di Aruba. Pa pueblo por haya un bista di locual ta e contenido di e plan di gobernacion di POR ‘Vision 17-21 Hunto Nos Por’, ta continua cu e serie di articulonan enofcando riba e contenido.
Educacion
Nos di POR ta para pa un educacion gratuito, di calidad y oportunidadnan igual pa tur alumno, mehora e prestacion y motivacion di nos maestronan, introduci e sistema di “assesment testing”, modernisa e curriculum y expande orario escolar. Sinembargo mester revisa e berdadero necesidadnan infrastructural y soluciona e problema di drop-outs. Mester mehora e conexion entre enseñansa profesional y mercado laboral y crea oportunidadnan igual. Reforsa departamento di enseñansa, introduci “medezeggenshapsraden”, fortifica structura di cuido y mehora enseñansa special y riba nivel superior mester incentiva universidadnan pa establece nan mes na Aruba.
Economia
Nos economia ta stagna, nos meta ta pa mehora clima di inversion na Aruba y stimula un economia basa riba solucionnan innovador. Un economia competitivo y diversifica cu realmente ta contribui na e calidad di bida di tur ciudadano, e revolucion economico ta e centro di nos propuesta! Tambe pa logra un turismo di calidad, un desaroyo regional di San Nicolas, un flexibilisacion di e sistema di pensioen y cu tur esakinan fortalece e posicion di e consumidor.
Pa loke ta labor; aumenta salario minimo pa compensa un eventual efecto inflacionario di e reforma fiscal.
Finansas publico
Nos ta busca reduccion di nos debe nacional. Mester reduci structuralmente gasto di gobierno, aumenta entrada di gobierno a traves di un reforma fiscal y urgentemente mehora e control financiero y transparencia cu mester bay cu ne. Meta ta, pa sanea finansas publico.
Integridad, transparencia y bon gobernacion
Como fundamento di bon gobernacion por ta propone accionnan concreto pa logra un nivel halto den calidad di gobernacion. Nos lo actualisa y implementa rapport calidad, nos lo introduci e ley di financiamento di partidonan politico. Lo reforsa ARA y CAD. lo de-politisa maneho di personal di gobierno y reforsa e procedimentonan di e destahonan publico mientras cu lo institui oficina di integridad, promocionando asina e cambio di cultura politico.
Cultura
Cultura ta un parti importante di e fundeshi di un sociedad y como tal e merece tur e atencion. POR lo implementa educacion social, lo rescata informacion cultural y lo salvaguardia nos herencia tangibel y intangibel. Nos lo crea mas fondo pa stimula sector cultural, lo percura pa e sector aki ta parti di e revolucion economico y lo promove cultura como parti integral di nos producto turistico.
Sector primario
Un parti integral di nos comunidad Arubiano ta nos sector primario y POR ta para pa un mehoracion di e posicion di e piscado, cunukero y criado di bestia por medio di stimula sector primario sostenibel, mehora maneho di tereno destina pa agricultura y intensifica programa di construccion y renovacion di pier. Tambe lo reforsa Santa Rosa, lo implementa ley di incentivo fiscal pa sector primario, lo regula piscamento cu harpoen, lo soluciona e problema di awa pa agricultura y lo introduci agricultura na scolnan
Transporte
Pa loke ta transporte, POR su meta ta pa mehora conexion y transporte aereo, maritimo y terestre. E forma cu nos lo logra e obhetivo aki ta pa medio di actualisa leynan di aviacion, reforsa departamento di aviacion civil y sostene e plan di inversion di aeropuerto y servicio di trafico aereo. Primoridial ta mehora e conexion entre Aruba, Corsou y Boneiro y sondea e posibilidad pa bin cu un aerolinea nacional. POR den e proximo gobernacion ta bay implementa e rapport “maritieme toekomst” van aruba y lo sigui amplia turismo crucero.
Cu e articulonan aki at spera di informa esnan cu pa un of otro motibo ainda no tabatin acceso di POR su plan di gobernacion. Esaki ta disponibel riba Facebook di POR E Forsa Nobo y ta completamente gratis. Por habrie riba cellular, tablet of computer.